გიორგი ლორია თბილისის „დინამოში“ ვარჯიშობს, მაგრამ ჯერჯერობით უცნობია, თუ სად გააგრძელებს კარიერას.
ლორიამ განაცხადა, რომ სამარის „კრილია სოვეტოვიდან“ საკუთარი ნებით არ წასულა. როგორც იცით, 32 წლის მეკარე რამდენიმე დღის წინ დაშორდა რუსულ კლუბს.
„კრილია ჩემი ინიციატივთ არ დამიტოვებია. სამწუხაროდ, ასეთია ფეხბურთელის ცხოვრება. მთელი სულითა და გულით მინდოდა გუნდის დახმარება, მაგრამ… კლუბის პერსონალს დიდ მადლობას ვუხდი. ცალკე გადავუხდი მადლობას „კრილიას“ ფანებს, რომლებიც მუდამ გვერდში მედგნენ, მით უმეტეს, რთულ მომენტებში. მოხარული ვარ, რომ მოგებისა თუ წაგების მიუხედავად ერთად ვიდექით. კიდევგ ერთხელ მადლობა და წარმატებები „კრილიას“. კიდევ შევხვდებით“ – დაწერა ლორიამ საკუთარ სოციალურ ქსელში.
რაც მალე გადაწყდება მისი საკლუბო მომავალი და მალე დაიწყებს თამაშს, მით უკეთესი. გიორგი საქართველოს ნაკრების მეკარეა და პრაქტიკა სჭირდება.
