საქართველომ მოსაგები ვერ მოიგო

საქართველოს წყალბურთელთა ნაკრებმა ევროპის ჩემპიონატზე პროგრამა მინიმუმი ვერ შეასრულა და საუკეთესო რვა გუნდს მიღმა დარჩა.

მეოთხედფინალში გასასვლელი მატჩი დეიან სტანოიევიჩის გუნდმა რუმინეთთან 11:18 წააგო.

მატჩის ბედი, ფაქტობრივად, პირველივე მეოთხედში გადაწყდა, რომელიც რუმინელებმა 5:1 მოიგეს, ხოლო დიდ შესვენებამდე უპირატესობა ექვს ბურთამდე გაზარდეს.

საქართველოს ნაკრებს არაფერი გამოსდიოდა. განსაკუთრებით გვიჭირდა შეტევაში, მაშინაც კი, როდესაც მეტობაში ვიყავით. ვითარება არ შესვენების შემდეგ შეცვლილა – რუმინელებმა მესამე მეოთხედიც მოიგეს და ბოლო პერიოდი ფორმალობად აქციეს, რომელიც ფრედ დამთავრდა და ჩვენების ტანჯვაც დასრულდა…

საქართველოს ნაკრები 9-12 ადგილებისთვის ბრძოლაში ზაგრებიდან დუბროვნიკში გადაინაცვლებს, სადაც 13 იანვარს, ნახევარფინალში, გერმანიის ნაკრებს შეხვდება.

ავტორის პროფილი

ირაკლი ნინიძე: ლეგენდის თანახმად, ამხანაგი ირკალი ნინიძე „სარბიელის“ ავტორია გასული საუკუნიდან, თუმცა ზუსტად რომელი წლიდანაა გადაჯაჭვული მისი ბედი „სარბიელთან“, ლეგენდა დუმს. რატომ დუმს ? იმიტომ, რომ ამხანაგ ნინიძეს არ უყვარს მოლაპარაკე ლეგენდები. მას უყვარს სპორტი, წერა და სპორტზე მარჯვედ წერა...