საქართველოს ხელბურთელთა ნაკრები სლოვენიაში გაემგზავრა, სადაც ევროპის ჩემპიონატისთვის დასკვნით შეკრებას გაივლის. ნაკრების მწვრთნელმა ტიტე კალანდაძემ ის 16 ხელბურთელი იახლა, რომლებსაც ევროპირველობისთვის მოამზადებს.
სლოვენიაში საქართველოს ნაკრებს ორი ამხნაგური მატჩი აქვს დაგეგმილი – კუვეიტთან და ალჟირთან. ევროპირველობაზე ნაკრებს კაპიტანი თეიმურაზ ორჯონიკიძე ტრავმის გამო დააკლდება. გუნდშია რამდენიმე ახალი სახეც. კალანდაძის გადადწყვეტილებით საქართველოს ნაკრები ევროპის ჩემპიონატზე ასეთი შემადგენლობით ითამაშებს:
ზურაბ ცინცაძე, დავით ნიქაბაძე, გიგი რუხაძე; ხაზეინ რუსტამოვი, ვახტანგ ხარებაშვილი, დავით გრიშიკაშვილი, გიორგი ლაპიაშვილი, მირიან გავაშელიშვილი, ვახტანგ ხელისუფალი, გიორგი არეშიძე, ირაკლი კბილაშვილი, ერეკლე არსენაშვილი, გიორგი დიხამინჯია, ზურაბ გოგავა, გიორგი ცხოვრებაძე, ნიკოლოზ კალანდაძე.
ევროპის ჩემპიონატი 15 იანვრიდან 1 თებერვლამდე პერიოდში დანიაში, შვედეთსა და ნორვეგიაში გაიმართება.
24 ნაკრები ექვს ოთხგუნდიან ჯგუფშია გადანაწილებული, ორ-ორი საუკეთესო კი მომდევნო ეტაპზე გავა, სადაც ორი ექვსგუნდიანი ჯგუფი შეიქმნება. პირველ-მეორე ადგილოსნები ნახევარფინალებში დაწყვილდებიან, მესამეადგილოსნები კი მეხუთე ადგილისთვის ითამაშებენ. საქართველოს ნაკრები E ჯგუფში შვედეთთან, ხორვატიასთან და ნიდერლანდებთან ერთად მოხვდა.