ვალენსია ნიკოს ყიდვას ცდილობს

Nico Gonzalez of FC Barcelona scores his side's 3rd goal during the LaLiga Santander match between FC Barcelona and Elche CF at Camp Nou on December... „ვალენსიადან”, რომლის კარსაც გიორგი მამარდაშვილი იცავს, ბოლო პერიოდში ორი ფეხბურთელი წავიდა. ესენი არიან ჰოლანდიელი მეკარე ჯასპერ სილესენი და პორტუგალიელი თავდამსხმელი გონსალო გედეში, რომელიც ინგლისური „ვულვერჰემპტონის” მოთამაშე გახდა. ახლა დროა კლუბმა მწვრთნელის ჯენარო გატუზოს სურვილებსაც მიხედოს. რა ხანია იტალიელი ამბობს, რომ მას კარგი გუნდის ასაწყობად ორი ნახევარმცველი კიდევ სჭირდება.

დღეისათვის ნახევარმცველთაგან გატუზოს განკარგულებაში არიან უგო გილიამონი, კარლოს სოლერი და იუნუს მუსა. ბოლო ცნობების თანახმად მათ შეიძლება დაემატოს 20 წლის ბარსელონელი ნიკო გონსალესი ან უბრალოდ ნიკო, რომელმაც „ბლაუგრანას” შემადგენლობაში 27 შეხვედრა ჩაატარა.

თუკი ნიკო „ღამურა” გახდება, ის მცველების წინ, ჩამშლელი ნახევარმცველის პოზიციას დაიკავებს. ამ ფუნქციის კაცი „მესტალიაზე” უკვე ორი წელიწადია არ ჰყოლიათ.

ვალენსიური პრესა წერს, რომ ნიკო მოკლე პასებით მოთამაშე გუნდისთვის ზედგამოჭრილია. მას მეტოქისთვის წართმეული ბურთის სუფთად გამოტანა ეხერხება, ეს კი სწორედ ისაა, რის დანერგვასაც გატუზო ცდილობს.

„ჩეებმა” ნიკოს თაობაზე „ბარსას” უკვე მიმართეს. მეზობლად (ვალენსია ბარსელონასთან უფრო ახლოსაა ვიდრე ფოთი თბილისთან) გადაბარგების წინააღმდეგი არც ფეხბურთელი ჩანს.

ნიკო „დეპორტივო ლა კორუნიას” ყოფილი ვარსკვლავის ფრანის შვილია. მისი აგენტია ცნობილი პორტუგალიელი საქმოსანი ჟორჟე მენდეში, უფრო ზუსტად კი ის მენდეშის კომპანიის „ჟესტიფუტეს” კლიენტია. თავის მხრივ მენდეში გატუზოს მეგობარი გახლავთ, რაც იმაზე მიუთითებს, რომ დიდი შანსია ეს ტრანსფერი წარმატებით დასრულდეს.

ჯერჯერობით „ბარსა” წინადადებას სწავლობს. „ვალენსია” პასუხს ელოდება.