ბარსამ ცუდად ითამაშა

ივან რაკიტიჩმა ესპანეთის სამეფო თასის პირველ ნახევარფინალურ შეხვედრაში თავის ყოფილ გუნდს, „ბარსელონას”, გოლი გაუტანა, მაგრამ არ იზეიმა — „სევილიამ” „ბლაუგრანას” 2:0 მოუგო.

კატალონიური პრესა შიშობს, რომ მათმა გუნდმა შესაძლოა ეს ანგარიში ვეღარც შემოატრიალოს და ორივე გოლს სამუელ უმტიტის აბრალებს. ფრანგს კოშმარული საღამო ჰქონდა, თუმცა მთლიანობაში გუნდმაც საზიზღრად ითამაშაო.

შეხვედრის დასაწყისში სევილიელთა მაროკოელმა მეკარე ბონომ ფაქტობრივად პირისპირ შესულ მესის არ გაატანინა, რაც, რასაკვირველია, გამორჩეული მომენტი იყო. ამის შემდეგ კი ფრანგმა მცველმა ჟიულ კუნდემ ანგარიში გახსნა.

ამ გოლში მოულოდნელი ის კი არ იყო, რომ მცველმა შეაგდო — მცველებს არც ისე იშვიათად გააქვთ, — არამედ ის, თუ როგორ გაიტანა მან. ჩვეულებრივ, მცველები ან ჯარიმას არტყამენ ან კუთხურიდან ჩაწოდებულ ბურთს თავით გზავნიან კარში. ფრანგმა სხვა გზა აირჩია: მან შესანიშნავი დრიბლინგით ჩაუქროლა ანტუან გრიზმანს, სერხიო ბუსკეტსსა და ზემოთ უკვე გაკრიტიკებულ უმტიტის, რასაც ზუსტი დარტყმა მიაყოლა, რაც შეგიძლიათ ვიდეოზე ნახოთ.

რასაკვირველია, ჩამოთვლილ სამეულს კუნდეს გაჩერება მართებდა, მაგრამ დაბნეულები ჩანდნენ.

შემდეგ, ბონომ მესის ერთი-ორი კიდევ აუღო, მაგრამ თავში ნახსენები კატალონიური პრესა წერს, რომ „ბარსამ” ცუდად ითამაშა, რაც იმაშიც გამოიხატა, რომ სევილიელთა კართან სწორედაც ერთი-ორი მომენტი შეიქმნა, მეტი კი არა.

„სევილია” კი პირიქით, კარგად იყო დაქოქილი, რაც, რასაკვირველია, მწვრთნელის ხულენ ლოპეტეგის დამსახურებაა.

ხოლო, 85-ე წუთზე რაკიტიჩმა მარცხენა ფრთიდან სივრცე იპოვა, შევარდა და ძლიერი დარტყმით შეხვედრას წერტილი დაუსვა.