სუპერ მამუ და კარგი გოგა

NBA-ში ორივე ქართველის გუნდმა ითამაშა. ერთმა მოიგო, მეორე – წააგო. ერთს სუპერთამაში ჰქონდა, მეორეს – კარგი.

დავიწყოთ სანდრო მამუკელაშვილით, რომლის „ტორონტო“ „იუტას“ ესტუმრა და 143:127 დაამარცხა. გამარჯვება იმდენად მარტივად მოვიდა, რომ ლიდერებს ბოლოს აღარ უთამაშიათ. მათ შორის მამუკელაშვილსაც.

ჩვენიანი ამჯერად სასტარტო შემადგენლობაში გამოჩნდა და მოედანზე გატარებულ 32.13 წუთში გუნდს 23 ქულით, 4 მოხსნით, 2 პასით, 5 ჩაჭრითა და 1 დაფარებით შეეწია. სანდრომ რვიდან ექვსი ორქულიანი, ექვსიდან სამი სამქულიანი და ოთხიდან ორი საჯარიმო ჩააგდო. მამუს ბურთი არ დაუკარგავს, მისი მოედანზე ყოფნის პერიოდში კი, კანადელებმა მეტოქეზე 23 ქულით მეტი ჩააგდეს.

„ტორონტო“ კონფერენციაში მეხეთე ადგილზეა. კანადელები მომდევნო მატჩს „ლოს ანჯელეს კლიპერსის“ წინააღმდეგ ითამაშებენ.

გოგა ბითაძის „ორლანდომ“ კი ზედიზედ მეხუთე მატჩი წააგო.

ფლორიდელები ამჯერად „ინდიანასთან“ დამარცხდნენ – 126:128.

ბითაძე საქმეში სათადარიგოთა სკამიდან ჩაერთო და პარკეტზე 19.54 წუთით გამოჩნდა. ჩვენებურმა 6 ქულა, 7 მოხსნა და 4 პასი მიითვალა. გოგამ სამიდან ერთი ორქულიანი და ექვსიდან ოთხი საჯარიმო ჩააგდო. პასივში ორი დაკარგვა ჰქონდა, მისი მოედანზე ყოფნის პერიოდში „ორლანდომ“ ოთხი ქულით მეტი ჩააგდო.

ფლორიდელები კონფერენციაში მერვე ადგილზე რჩებიან, მომდევნო მატჩისთვის კი კლივლენდს ესტუმრება.