ჟორჟი არ იყიდება

ოთხშაბათს „ლიონის’’ მწვრთნელმა პაულუ ფონსეკამ სატრანსფერო ბაზარზე ილაპარაკა. „მოლენბეკთან’’ ამხანაგური შეხვედრის შემდეგ (0:0) პორტუგალიელს მისი გუნდის შემადგენლობაზე ჰკითხეს. ფონსეკამ კორენტენ ტოლისოსა და ჟორჟ მიქაუტაძის შესახებ კატეგორიულად თქვა: „კოკო ისევე როგორც ჟორჟი მე თავად მჭირდება. ჩემთვის მათი გაყიდვა არ განიხილება და ვფიქრობ კლუბისთვისაც ასეა’’.

მწვრთნელს მხარი აუბა მიქაუტაძემაც (ფრანგულის მცოდნეებს შეგიძლიათ ქვემოთ მისი ინტერვიუ მოისმინოთ). ქართველმა თქვა: „მე 2028 წლამდე „ლიონის’’ მოთამაშე ვარ. აქ იმიტომ ვარ, რომ ჩემს გუნდს, ჩემს კლუბს დავეხმარო’’.

ალექსანდრ ლაკაზეტის წასვლის შემდეგ მიქაუტაძეს „ლიონის’’ მთავარი ვარსკვლავის ტვირთი დააწვა. მას ჰკითხეს, ხომ თრგუნავს ასეთი პასუხისმგებლობა. თავდამსხმელმა უპასუხა:

„მე ეს პასუხისმგებლობა მომწონს. ჩვენი ფეხბურთით უნდა ვისიამოვნოთ და ასეთი გაწყობა ფანებს და კლუბს გადავცეთ. მინდა გასულ სეზონთან შედარებით მეტი გოლი (17 ყველა შეჯიბრებაში) გავიტანო და კიდევ უფრო საკვანძო ფეხბურთელი გავხდე. ჩვენი ამბიცია ჩემპიონთა ლიგაში მოხვედრაა’’.