დღეს ლოს ანჯელესში ეცხელება

დღეს, საქართველოს დროით 23 საათზე კლუბთა მსოფლიოს ჩემპიონატზე ხვიჩა კვარაცხელიას „პარი სენ ჟერმენი’’ მადრიდის „ატლეტიკოს’’ დაუპირისპირდება. შეხვედრა პასადენას „როუზ ბოულზე’’ გაიმართება. ლოს ანჯელესში ცხელა. ტემპერატურა დღისით 32 გრადუსამდე მოიმატებს, შეგრძნება კი 37 გრადუსისა იქნება. მატჩი ადგილობრივი დროით შუადღის 12 საათზე დაიწყება.

„ჩვენ სიცხის არ გვეშინია,’’ ― განაცხადა მატჩის წინა პრეს-კონფერენციაზე პარიზელთა მწვრთნელმა ლუის ენრიკემ.

ფრანგული პრესა წერს, რომ პარიზელებს „მატრასების მკერავებზე’’ შური აქვთ საძიებელი: 2024 წლის 7 ნოემბერს მათ „პარკ დე პრენსზე’’ ჩემპიონთა ლიგის შეხვედრაში 1:2 წააგეს.

როგორც ცნობილია პსჟ-ს არ ეყოლება ოსმან დემბელე, რომელსაც ბარძაყი სტკივა. გუნდის ლიდერად აღიარებული თავდამსხმელი საფრანგეთის ნაკრებში, ერთა ლიგის შეხვედრაში დაშავდა. 28 წლის დემბელეს სავარაუდოდ პორტუგალიელი გონსალო რამუში შეცვლის.

შეხვედრას გაუძღვება იშტვან კოვაჩი, რომელმაც 31 მაისს ჩემპიონთა ლიგის ფინალი იმსაჯა. პსჟ-მ ის შეხვედრა „ინტერს’’ 5:0 მოუგო.

ამბობენ, რომ დემბელეს არყოფნას თუ არ ჩავთვლით, პარიზული გუნდი ფაქტობრივად იმავე შემადგენლობით ითამაშებს, რომლითაც ხსენებულ ფინალში, მიუნხენის „ალიანც არენაზე’’ ითამაშა.