კალაშნიკოვა ნახევარფინალში არ გაუშვეს

ოქსანა კალაშნიკოვასა და ირინა შიმანოვიჩის წარმატებული სერია „უიმბლდონზე“ მეოთხედფინალში შეწყდა.

ქართველისა და ბელარუსი სპორტსმენი წყვილი ნახევარფინალში გასასვლელ მატჩში ამერიკელ კეროლინ დოლეჰაიდთან და ჩინელ შუაი ჟანგთან 4:6, 1:6 დამარცხდა.

არადა, პირველი სეტში კალაშნიკოვამ და შიმანოვიჩმა მეშვიდე გეიმში მეტოქეს ჩაწოდება აართვეს და 4:3 დაწინაურდნენ, მაგრამ შემდეგ ზედიზედ სამი გეიმი დათმეს და სეტიც ზედ მიაყოლეს.

მეორე სეტში კი, მეტოქესთან საერთოდ ვერაფერი გააწყვეს და, თითქმის უბრძოლველად წააგეს. შეგახსენებთ, რომ კალაშნიკოვა-შიმანოვიჩის დუეტმა მანამდე სამი გამარჯვება იზეიმა: მათ ჯერ იაპონელები აოიამა და შიბაჰარა 6:2, 6:4 დაამარცხეს, შემდეგ ნორვეგიელი ეიკერსა და რუს პანოვას 6:0, 6:4 მოუგეს, ხოლო ბრაზილიელ გამარა მარტინშსა და ბელარუს მაროზავას 6:4, 7:6 სძლიეს.