მო-ჟორდი აქედანო

ესპანურ რადიოს Cadena SER-ს აქვს გადაცემა, რომელსაც El Larguero ჰქვია და ამ გადაცემის წამყვანთა თანახმად, როდესაც ლუის ენრიკე ესპანეთის ნაკრების მორიგ შემადგენლობას გამოაცხადებს, მასში ბარსელონელი ჟორდი ალბა კვლავ არ იქნება.

ამბობენ, რომ ნაკრების თავკაცის მხრიდან ალბას ასეთი უგულებელყოფის მიზეზი მასა და ფეხბურთელს შორის ცუდი ურთიერთობაა — მოგეხსენებათ, ლუის ენრიკე 2014-17 წლებში სწორედ „ბარსას” ედგა სათავეში, სადაც 2012 წლიდან თამაშობს კიდეც მარცხენაფლანგელი. El Larguero ამბობს, რომ თავისი ყოფილი შეგირდის ნაცვლად ენრიკე სერხი რობერტოსა და ისკოს დაეყრდნობა.

ამ თემაზე ესპანური მედია ყურადღებას იმიტომ ამახვილებს, რომ ჟორდი ალბა მიმდინარე სეზონში შესანიშნავ ფორმაშია, მაგრამ ნაკრების თავკაცისთვის ეს საკმარისი არ არის.

უეფას „ერთა ლიგის” მოახლოებულ შეხვედრაში ესპანელები ხორვატებს ხვდებიან. ამას გარდა მათ ბოსნიასთან ელით ამხანაგური თამაში. ამბობენ, რომ ამ მატჩებისთვის ლუის ენრიკე „ესპანიოლის” ცენტრალურ მცველს მარიო ერმესოსა და თავდამსხმელ ბორხა იგლესიასს გამოიძახებს.

ავტორის პროფილი

ლუკა თალაკვაძე: ლუკა თალაკვაძე ნამდვილი სარბიელელია. ყველას შემწე, გვერდში მდგომი, ალალი და უსაყვედურო. ჟურნალისტის პროფესიის ქიციც იცის და ქიცმაცურიც.

უახლესი პოსტები

Post Views: 4