ნაპოლის პირველი მარცხი

Kevin De Bruyne of Napoli scores a penalty goal during the Serie A match between AC Milan and SSC Napoli at Giuseppe Meazza Stadium on September 28,... სერია A-ში „მილანი’’ გალიდერდა. ნახევარ საათზე მეტი ხნის განმავლობაში რიცხობრივ უმცირესობაში დარჩენილმა „როსონერიმ’’ შეხვედრა, რომელშიც პირველი ტაიმის შემდეგ 2:0-ს იგებდა, საბოლოო გამარჯვებამდე მიიყვანა. 57-ე წუთზე მილანელებს ჯოვანი დი ლორენცოს წაქცევისთვის ეკვადორელი მცველი პერვის ესტუპინანი გაუძევეს. ამ ეპიზოდში მასპინძლები პენალტითაც დასაჯეს. თერთმეტმეტრიანი კევინ დე ბრუინმა გაიტანა, თუმცა „აძურიმ’’ მეტი ვეღარ შეძლო.

დე ბრუინი ანტონიო კონტემ 72-ე წუთზე მაკედონიელი ელიფ ელმასით შეცვალა, რამაც ბელგიელი გააბრაზა. აშკარა იყო, რომ ვეტერანს შეცვლა არ ესიამოვნა. სათადარიგოთა სკამზე ის მკვახე ინგლისური გამოთქმებით ინელებდა ბრაზს.

ნეაპოლური საიტები აღნიშნავენ, რომ „მანჩესტერ სიტის’’ ყოფილ ვარსკვლავს ამ შეხვედრაში მაინცდამაინც არ გაუბრწყინია, თუმცა პენალტი კარგად შეასრულა. Areanapoli-ს თქმით მისგან ნეაპოლელი ქომაგები უკეთეს თამაშს ელიან.

რაც შეეხება პირველ ტაიმს, შესვენებამდე „მილანის’’ ამერიკელმა შემტევმა კრისტიან პულიშიჩმა გამოიჩინა თავი. მან მესამე წუთზე ბელგიელ ალექსის საელემეკერსს გაატანინა პირველი გოლი, 31-ე წუთზე კი ფრანგი იუსუფ ფოფანას პასით თავად შეაგდო.

ამ გამარჯვების შედეგად მასიმილიანო ალეგრის გუნდმა „ნაპოლის’’ გატანილ-გაშვებულთა უკეთესი სხვაობის წყალობით გადაასწრო. „პარტენოპეელებმა’’ ახალ სეზონში პირველად წააგეს.

ხუთი ტურის მერე 12 ქულა აქვს „რომასაც’’, რომელმაც არტემ დოვბიკისა და მატიას სოულეს გოლებით „ვერონას’’ 2:0 მოუგო.