ყინულზე დაწყვილდნენ

ჰოკეიში მიმდინარე მსოფლიოს ჩემპიონატზე ყველა მეოთხედფინალისტი ცნობილია.

ფლეი ოფში აქამდე გასულ ექვს გუნდს ორიც დაემატა – გერმანია და ლატვია.

გერმანელების საქმე უფრო მარტივად იყო – ფრანგებს თუ მოუგებდნენ, მეოთხედფინალში გავიდოდნენ. ასეც მოხდა – გერმანიამ 5:0 იმარჯვა. თუმცა, როგორც შემდეგ გაირკვა, წაგებითაც კი გავიდოდნენ, რადგან მათმა კონკურენტმა დანიამ ფინეთთან 1:7 წააგო.

აი, მასპინძელი ლატვიელების საქმე კი ცოტა რთულად იყო – ბალტიისპირელები ფლეი ოფში რომ გასულიყვნენ, ჯგუფის ლიდერ, აქამდე ყველა მატჩის მომგებ შვეიცარიასთან არ უნდა წაეგოთ. ლატვიელებმა არათუ პროგრამა მინიმუმი შეასრულეს, არამედ ოვერტაიმში 4:3 მოიგეს და ჯგუფში სულაც მესამე ადგილზე გავიდნენ.

შედეგად, მეოთხედფინალში გუნდები ასე დაწყვილდნენ: ამერიკა – ჩეხეთი; შვედეთი – ლატვია; შვეიცარია – გერმანია; კანადა – ფინეთი.