კვარას ცენტრალურ თავდამსხმელად ვარაუდობენ

Khvicha Kvaratskhelia of SSC Napoli during the Serie A match between US Lecce and SSC Napoli at Stadio Via del Mare on April 07, 2023 in Lecce, Italy. ვიქტორ ოსიმენის ჯანმრთელობა ჯერ კიდევ გამოსაკვლევია. ლუჩანო სპალეტის გეგმა „ბ” აქვს მოსაფიქრებელი. ფაქტია, რომ „მილანთან” შეხვედრისთვის ნიგერიელი გუნდთან ერთად არ მომზადებულა, მოედანზე თუ დარბაზში ინდივიდუალურად ვარჯიშობდა. მორიგი ტრავმისგან თავის დაზღვევის მიზნით ინდივიდუალურად ვარჯიშობდა ახლახან გამოჯანმრთელებული ჯაკომო რასპადორიც, ჯოვანი სიმეონე კი თერაპიული მკურნალობის კურსს გადის და ჩემპიონთა ლიგის პირველ მეოთხედფინალურ შეხვედრაში ნამდვილად ვერ ითამაშებს. ამრიგად, „ლა რეპუბლიკას” ვერსიით, მოცემული მომენტისთვის „ნაპოლის” განკარგულებაში ცენტრალური თავდამსხმელი არ არის და ამ როლის მორგება დიდი ალბათობით ხვიჩა კვარაცხელიას მოუწევს.

და მაინც, ჯერჯერობით, ყველაზე სავარაუდო რასპადორის თამაშია. საბოლოოდ, ყველაფერი დღეს, ვარჯიშის შემდეგ გაირკვევა, როდესაც სპალეტი ხვალინდელი შეხვედრის განაცხადში შესაყვანთა გვარებს ჩამოწერს. მხოლოდ ამის შემდეგ გახდება შესაძლებელი, იმაზე ფიქრო, თუ ფეხბურთელთა შერჩეული ჯგუფიდან რომელ თერთმეტეულს დაეყრდნობა მწვრთნელი.

„ლა რეპუბლიკას” აზრით „სან სიროზე” დაცვაში ითამაშებს მატიას ოლივერა, ნახევარდაცვაში პიოტრ ჟელინსკი, თავდასხმაში კი მატეო პოლიტანო — ეს ის სამეულია, რომელიც მწვრთნელმა ლეჩეში დაასვენა. თუმცა, გაზეთი თავს იზღვევს და ამბობს, რომ კატეგორიულად ლაპარაკი და მარიო რუის, ელიფ ელმასისა და ირვინგ ლოსანოს ჩამოწერა არ შეიძლება.

ყველაზე საინტერესო კი, რასაკვირველია, ცენტრალური თავდამსხმელის თავსატეხის ამოხსნაა.