სანდრო იგებს, გოგა აგებს

NBA-ში მორიგი მატჩები გამართეს სანდრო მამუკელაშვილისა და გოგა ბითაძის გუნდებმა. „სან ანტონიო სპურსმა“ „პორტლენდს“ უმასპინძლა და 129:127 დაამარცხა, „ორლანდო“ კი, „კლივლენდს“ ესტუმრა და 94:118 წააგო.

„სპურსმა“ პირველად ითამაშა ქალაქ ოსტინში, სადაც სულ ოთხ მატჩს გამართავს. მამუკელაშვილი ამჯერად საქმეში სათადარიგოთა სკამიდან ჩაერთო და პარკეტზე 21.03 წუთი დაჰყო, რა დროშიც 4 ქულა, 7 მოხსნა, თითო პასი და დაფარება, ასევე 2 ჩაჭრა მიითვალა. ერთია ოღონდ, სანდროს მიზანმა უმტყუნა: ჩვენებურმა 6-დან მხოლო ორი ორქულიანი ჩააგდო და ორივე სამქულიანი აააცილა.

„სპურსი“ ახლა 21 მოგებითა და 59 წაგებით დასავლეთ კონფერენციაში მე-14 ადგილს იკავებს. გრეგ პოპოვიჩის გაწვრთნილი გუნდი 9 აპრილს „მინესოტა ტიმბერვულვზს“ შეხვდება.

გოგა ბითაძემაც 21 წუთი ითამაშა და გუნდს 7 ქულა შესძინა, 7 მოხსნასთან, 2 დაფარებასთან და პასთან ერთად.

გოგამ ექვსიდან სამი ორქულიანი ჩააგდო, ერთი სამქულიანი ააცილა, ხოლო ორი ჯარიმიდან ერთი გამოიყენა. „ორლანდოს“ რეგულარულ სეზონში კიდევ ორი მატჩი აქვს ჩასატარებელი: „ბრუკლინთან“ 8 აპრილს, ხოლო „მაიმისთან“ 9 აპრილს.