მესის მოუწყობელი პარიზული ცხოვრება

ლეო მესი პარიზში თავის გემოზე ჯერ ვერ მოწყობილა. არგენტინელი მეგავარსკვლავი ოჯახთან ერთად კიდევ სახლის ძიებაშია.

მესის თანაკლუბელმა და თანამემამულემ ანხელ დი მარიამ თქვა, რომ მსოფლიოს ექვსგზის საუკეთესო ფეხბურთელის პარიზული ცხოვრება გარედან უფრო ლამაზად ჩანს, სინამდვილეში კი პრობლემურია.

არგენტინულმა გაზეთმა „ოლემ“ დი მარიას ციტატა მოიყვანა. ნახევარმცველი ამბობს, რომ „მესის ახალი ცხოვრება არც ისე კარგია“.

დი მარია: „როდესაც ლეო სადილად მიდის, ყოველთვის მოტოციკლები ან მანქანები ახვევია. მაგრამ, აქაურმა ხალხმა სხვისი პატივისცემა იცის და თუ ჩვენ სადმე შევდივართ, ყველა თავს გვანებებს. თუმცა, წასასვლელი მაინცდამაინც არსად გვაქვს“.

მესის პარიზში სახლი ჯერ არ აქვს. ის, მისი მეუღლე ანტონელა და სამი შვილი სასტუმრო „როიალ მონსოში“ ცხოვრობენ.

ეს გახლავთ ოტელი, რომლის ყველაზე იაფი ნომერი დღე-ღამეში 1000 ევროა. მას აქვს ექვსი რესტორანი და კინოთეატრი.

„როიალ მონსო“ გაიხსნა 1928 წელს. ცნობილ ადამიანთა შორის, ვისაც ამ სასტუმროში უცხოვრია, იყვნენ უინსტონ ჩერჩილი და რობერტ დე ნირო.

ამბობენ, რომ 2017 წელს, სანამ პარიზში სახლს შეარჩევდა, ამავე სასტუმროში ცხოვრობდა ნეიმარი.