ბარსა ექვსთვიანებს ეძებს

„ბარსელონა” „ვალენსიას” თავდამსხმელის როდრიგო მორენოს ყიდვას ცდილობს. ესპანეთის ჩემპიონი სხვა ვარიანტებზეც მუშაობს, მაგრამ მორენოსთან დაკავშირებული მოლაპარაკებები უკვე დაწყებულია.

„ბარსას” აქტიურობის მიზეზი კი დაშავებული ლუის სუარესის შემცვლელის მოძებნა გახლავთ.

სუარესმა მუხლის ოპერაცია გაიკეთა და ოთხი თვე რეაბილიტაციას მოუნდება. შესაბამისად, „ბლაუგრანა” თავდამსხმელს ეძებს, ოღონდ გარკვეული პირობით: ვინაიდან ამ ეტაპზე კატალონიური კლუბი ფულის ხარჯვას ერიდება, გადაწყვიტა ისეთი ვინმე მოძებნოს, ვინც ექვსთვიან კონტრაქტსაც დაყაბულდება. ხოლო, თუ ფეხბურთელი და „ბარსა” ერთმანეთს შეეწყობიან, ზაფხულში უკვე ნაღდ გამოსყიდვაზე დაიწყება ლაპარაკი.

„ბარსას” წარმომადგენლები ამბობენ, რომ მათ მიერ დასახული ამოცანის ხორცშესხმა რთულია, მაგრამ გამორიცხული არ არის. თუ მორენოს ვერ იყიდიან, პიერ-ემერიკ ობამეიანგის ან ტიმო ვერნერის ვარიანტს მოსინჯავენ. პირველი „არსენალში” თამაშობს, ხოლო მეორე „ლაიპციგში”, თუმცა ამ ორმა კლუბმა კატალონიელთა გეგმების შესახებ რომ გაიგო, ჯერჯერობით შორს დაიჭირა.

კიდევ, ლაპარაკია „მონაკოს” თავდამსხმელ ბენ იედერზეც, თუმცა მორენო მაინც ყველაზე სავარაუდო ვარიანტია.