ნახევარფეხბურთელი

ზაფხულში, 27 წლის ბრაზილიელის ფილიპე კოუტინიუს „ბაიერნში” გადასვლას დიდი ხმაური მოჰყვა. „ალიანც არენაზე” მას იმედით შეეგებენ. კოუტინიუ „რეკორდმაისტერს” „ბარსელონამ” მიაქირავა, „ბარსამდე” კი თავდამსხმელი „ლივერპულში” გამოდიოდა, სადაც ბრწყინავდა.

ჩემპიონთა ლიგაში, პირეუსის „ოლიმპიაკოსთან” ბავარიელთა 3:2 გამარჯვების შემდეგ, ვეტერანმა გერმანელმა დიტმარ ჰამანმა კოუტინიუ გააკრიტიკა. მან თქვა:

„ჩემი აზრით, ის მიუნხენელთა გუნდში უცხო სხეულია. მე მის კარგად ნათამაშევს ვერ ვიხსენებ. როდესაც ასეთი ფეხბურთელი გყავს, ის კი შენს შეტევებს აქცენტებს ვერ უკეთებს, გამოდის ნახევარფეხბურთელი გყოლია, — უთხრა ექსპერტმა ტელეკომპანია „სქაის”, — რასაკვირველია, წინ კიდევ 30-35 მატჩია, მაგრამ ოდესმე ხომ უნდა ათამაშდეს კარგად”.

„ბარსადან” ბრაზილიელის იჯარა სეზონის ბოლომდეა ძალაში.

საბერძნეთში კოუტინიუმ მოედანზე 90 წუთი დაჰყო, მაგრამ გერმანული გუნდის 3 გოლიდან მონაწილეობა ერთშიც კი არ მიუღია.

ამის მიუხედავად, „ბაიერნის” მწვრთნელმა ნიკო კოვაჩმა ფილიპე კოუტინიუ დაიცვა: „ერთადერთი, რაც ფილიპეს ამ ეტაპზე აკლია, იღბალია. ის მოედანზე მშვენივრად მოქმედებს. კოუტინიუს, ისევე, როგორც სხვა ფეხბურთელების თამაშით, კმაყოფილი ვარ”.

„ბაიერნის” სპორტულმა დირექტორმა ჰასან სალიჰამიჯიჩმა კი ცოტა სხვანაირად შეხედა საკითხს: „ფილიპეს დრო სჭირდება. ის შემოქმედი ფეხბურთელია, რომელიც ჯერ 100 პროცენტით არ არის მზად. მას გაცილებით უკეთ შეუძლია თამაში, თუმცა, რასაც აკეთებს, ისიც ძალიან კარგია”.