გვიყვარხარ, ლორის!

„ლივერპულის” ყოფილმა მეკარემ ლორის კარიუსმა, რომელმაც შარშან, ჩემპიონთა ლიგის ფინალში ორი უხეში შეცდომა დაუშვა, ყოფილ თანაგუნდელებს ინტერნეტით გულწრფელი მილოცვა გაუგზავნა.

შეგახსენებთ, რომ მერსისაიდელები 2018 წელსაც იყვნენ ფინალში, სადაც „რეალთან” წააგეს 1:3. გაშვებული გოლებიდან ორი კარიუსის ბრალი იყო.

მწარე დამარცხების შემდეგ კარიუსი „ლივერპულმა” სტამბოლის „ბეშიქთაშში” გაუშვა, თავად კი „რომადან” ბრაზილიელი ალისონი შეიძინა. ალისონმა გაამართლა.

შაბათს, 2019 წლის ფინალში, „ლივერპულმა” „ტოტენჰემ ჰოთსპური” დაამარცხა 2:0 და ჩემპიონთა ლიგის გამარჯვებული გახდა.

გერმანელმა გოლკიპერმა კი ყოფილ თანაგუნდელებს „ტვიტერში” მიწერა: „გილოცავთ. გულწრფელად ვიზიარებ ყველას, კლუბის და ფანების სიხარულს. თქვენ ამას იმსახურებდით”.

და „ლივერპულის” ფანებმა თავიანთ ყოფილ მეკარეს თბილადვე უპასუხეს:

„ლორის, ძმაო, გისურვებ ყველაფერ საუკეთესოს”, — დაწერა ერთმა.

„ეს საღამო შენც გეკუთვნოდა, ლორის!”, — თქვა მეორემ.

„შენი მოლოცვა ბევრს ნიშნავს, კარიუს. არ დაგავიწყდეს, You’ll Never Walk Alone!!!!” — ესტაფეტა აიტაცა მესამემ.

„გვიყვარხარ, ლორის!” — დააგვირგვინა მეოთხემ.

ლორის კარიუსი „ბეშიქთაშში” 2020 წლამდეა იჯარით გაშვებული, თუმცა ვადის გასვლის შემდეგ, სავარაუდოდ, „ლივერპული” მას აღარ დაიბრუნებს. ან ახალ იჯარას გაუფორმებს სადმე ან უბრალოდ გაყიდის.

ავტორის პროფილი

ლუკა თალაკვაძე: ლუკა თალაკვაძე ნამდვილი სარბიელელია. ყველას შემწე, გვერდში მდგომი, ალალი და უსაყვედურო. ჟურნალისტის პროფესიის ქიციც იცის და ქიცმაცურიც.