საზიზღარო – სარბიელი

მარიო ბალოტელიმ ძველ მეგობარ პოლ პოგბას საფრანგეთის ნაკრების მიერ ამხანაგურ შეხვედრაში იტალიის 3:1 დამარცხება მიულოცა, მაგრამ მიაწერა, მაინც მაგარი საზიზღარი ხარო. ეხუმრა.

ფრანგთაგან გოლები გაიტანეს სამუელ უმტიტიმ, ანტუან გრიზმანმა (პენალტით) და ოსმან დემბელემ. „სკუადრა აძურას” მხრიდან კი 0:2-ზე ლეონარდო ბონუჩიმ შეაგდო. შეხვედრა ნიცაში გაიმართა, სადაც იტალიის ნაკრების მეცხრე ნომერი სუპერმარიოდ წოდებული ბალოტელი გამოდის.

„მმმმ… ok! გუშინდელ საღამოზე ასე გეტყვი. ბრავო პოლ!!! მაგრამ მაინც საზიზღარი ხარ ძმაო”, — დაწერა ბალოტელიმ ინსტაგრამზე.

ძმაკაცთან ლაღობისა და ფრანგთა გამარჯვების მიუხედავად პოგბას მაინც ცუდი საღამო ჰქონდა — გულშემატკივარმა ობსტრუქცია მოუწყო. ერთხელ, მაშინ უსტვინეს, როდესაც არასწორი პასი გადააწოდა, ხოლო მეორეს მოედნიდან რომ გადიოდა — „მანჩესტერ იუნაიტედის” ნახევარმცველი 86-ე წუთზე „სევილიაში” მოთამაშე სტივენ ნ’ზონზიმ შეცვალა.

ანტუან გრიზმანმა და მწვრთნელმა დიდიე დეშამმა პოგბას დაცვა სცადეს, მაგრამ როგორც ჩანს ფრანგ გულშემატკივარს მსოფლიოს მოახლოებულ ჩემპიონატზე მისი მაინცდამაინც არ ეიმედება.

ავტორის პროფილი

ლუკა თალაკვაძე: ლუკა თალაკვაძე ნამდვილი სარბიელელია. ყველას შემწე, გვერდში მდგომი, ალალი და უსაყვედურო. ჟურნალისტის პროფესიის ქიციც იცის და ქიცმაცურიც.