მიქაუტაძეს იღბალი აკლდა

AS: „ჟორჟ მიქაუტაძე ბევრ ეპიზოდში მონაწილეობდა, მაგრამ იღბალი აკლდა. მან საგოლე მომენტებიც შექმნა და კარშიც დაარტყა, ოღონდ გოლი არ გავიდა’’.

„ჟირონამ’’ „ვილიარეალს’’ 1:0 პაუ ნავაროს უიღბლობის ანუ ავტოგოლის დახმარებით მოუგო, რაც 45+1 წუთზე, ზედ შესვენების წინ მოხდა. ეს გახლდათ კატალონიელთა მეოთხე გამარჯვება ბოლო ექვს საშინაო შეხვედრაში. სანაკრებო კვირეულის გამო ორივე გუნდს ორ კვირაზე მეტია არ უთამაშია, რამაც სავარაუდოდ მათ ფორმაზე ცუდად იმოქმედა.

„ვილიარეალი’’ 30 ტურის შემდეგ 58 ქულით მესამე ადგილზეა. ის ერთი ქულით უსწრებს მეოთხე ადგილზე მყოფ „ატლეტიკოს’’, მეხუთეადგილოსან ბეტისს კი 13 ქულით აღემატება. მიქაუტაძის გუნდი სავარაუდოდ ჩემპიონთა ლიგაში გამსვლელ პოზიციას არ დაკარგავს, მაგრამ ვერც მეორე პოზიციაზე იოცნებებს, რადგან „რეალს’’ 11 ქულით ჩამორჩება. მეორე მხრივ, შემაშფოთებელია ის გარემოება, რომ „ყვითელმა წყალქვეშა ნავმა’’ ბოლო შვიდი მატჩიდან ოთხი წააგო.

„დღევანდელი შეხვედრის ანალიზი ძალიან იოლია: პირველი ტაიმი შესაძლებლობებზე გაცილებით ცუდად ჩავატარეთ. შესვენების მერე მოწინააღმდეგემ თავის ნახევარზე გადასვლის შესაძლებლობა მოგვცა. მთელი მატჩი ისე რომ ჩაგვეტარებინა, როგორც მეორე ტაიმი, გაცილებით მეტი შანსი გვექნებოდა’’, – თქვა მატჩის შემდეგ „ვილიარეალის’’ მწვრთნელმა მარსელინომ.

მიქაუტაძის თამაში სხვადასხვა საიტებმა ასე შეაფასეს: flashscore – 6.1; sofascore – 6.5; whoscored – 6.1; fotmob – 6.2