ბითაძემ სეზონის რეკორდი გაიმეორა

NBA-ში მორიგი მატჩები გაიმართა. ითამაშა ორივე ქართველის გუნდმა და როგორც მოსალოდნელი იყო, მატჩებიც ისე დასრულდა.

გოგა ბითაძის „ორლანდო მეჯიქმა“ კლივლენდთან 104:94 მოიგო და ამაში ჩვენებურის წვლილიც დიდია – 15 ქულა, 7 მოხსნა, 4 დაფარება და 2 პასი. ბითაძემ მოედანზე 29 წუთი დაჰყო. რვა ორქულიანიდან ექვსი ჩააგდო, ხოლო ოთხი საჯარიმოდან სამი გამოიყენა. აღსანიშნავია, რომ 15 ქულა ბითაძისთვის ამ სეზონში რეკორდის გამეორებაა. ჩვენებური განსაკუთრებით კარგად ირჯებოდა დაცვაში და ამაზე ოთხი დაფარებაც მეტყველებს.

16 მოგებითა და 7 მარცხით „ორლანდო“ აღმოსავლეთ კონფერენციაში მე-2 ადგილს „მილუოკისთან“ იყოფს. პირველზე „ბოსტონია“, რომელთანაც „ორლანდო“ მორიგ მატჩს გამართავს, სტუმრად, 15 დეკემბერს.

ისევ წააგო „სან ანტონიომ“. გრეგ პოპოვიჩის გაწვრთნილმა გუნდმა ზედიზედ მე-16 მარცხი განიცადა – ამჯერად, „ჰიუსტონთან“ (82:93). განვითარების ლიგიდან გუნდში მობრუნებულ სანდრო მამუკელაშვილს კი, ისევ მცირე დრო მიეცა. ჩვენებურმა 3.47 წუთში მხოლოდ ერთი მოხსნისა და ერთი პერსონალური ფოლის აღება მოასწრო. „სან ანტონიო“ დასავლეთ კონფერენციის ბოლო ადგილოსანია და მომდევნო მატჩს 14 დეკემბერს შინ, „ლოს ანჯელეს ლეიკერსთან“ ითამაშებს.