ვალენსიას კარს გოლისგან მარტო მამარდაშვილი ვერ დაიცავს

„ვალენსიამ” „ალმერიასთან” სტუმრად 2:2 ითამაშა. სტუმართა გუნდი ორჯერ დაწინაურდა, მაგრამ ამ შეხვედრამ კიდევ ერთხელ ცხადჰყო, რომ „ღამურებს” ჩინებული მეკარე — გიორგი მამარდაშვილი — და სუსტი დაცვა ჰყავთ. აღწერა საჭირო არ არის, ქვემოთ მოყვანილ ვიდეოზე ყველაფერი კარგად ჩანს — გუნდს გოლის გაშვებისგან მარტო მეკარე ვერ გადაარჩენდა. იმ ორ ეპიზოდში, როდესაც „ალმერიამ” მიზანს მიაღწია, გიორგის მოგერიებულ ბურთთან ვინმე მოწინააღმდეგეზე სწრაფად უნდა მისულიყო.

რჩება შთაბეჭდილება, რომ მამარდაშვილმა ვალენსიას საფეხბურთო საზოგადოება ცოტა გაანებივრა და კარგი, ხშირად კი ჩინებული თამაშის შემდეგ მისი ქებით თავს დიდად არავინ იწუხებს. ალბათ, ვარაუდობენ, რომ გოლკიპერის შემთხვევაში ეს ასეც უნდა იყოს. ანდა, ხდება ის, რაც ყველა ქვეყანას ახასიათებს — ლეგიონერის კარგ თამაშს უფრო მოკრძალებით აღნიშნავენ, ვიდრე ადგილობრივი ფეხბურთელისას. ასე მაგალითად, პორტალმა superdeporte.es ვალენსიელთაგან ყველაზე მაღალი შეფასება (8) ხავი გუერას დაუწერა, ტიერი რენდალ კორეიას 7 არგუნა, დიეგო ლოპესს 6,5, მამარდაშვილს და კიდევ ორი თანაგუნდელის კი 6 ქულა ამყოფინა. გიორგის არაჩვეულებრივი თამაშის შესახებ გამორჩევით არც მატჩის შემდგომ ინტერვიუებში ულაპარაკია ვინმეს. სამაგიოეროდ საერთაშორისო საიტმა flashscore.com-მა არ დაკარგა ობიექტურობა და ქართველ კარის მცველს „ჩეებში” ყველაზე მაღალი შეფასება 8,1 დაუწერა. ამ პორტალის ვერსიით ხავი გუერამ 8 მიიღო.