ხმა თვით კარუზომ ამოიღო

კასტელ დი სანგროს სტადიონი ტეოფილო პატიანის სახელობისაა. ქალაქის მერი ანჯელო კარუზო ამ დღეებში მისი ტევადობის 2500 ადგილით გაზრდას აპირებს.

საქმე ის არის, რომ აბრუცოს პროვინციის ამ დასახლებულ პუნქტში „ნაპოლი” სეზონისწინა შეკრებას გადის და გულშემატკივრები ამხანაგურ თამაშებზე ვერ ეტევიან.

Radio Crc-ს ცნობით „ჰათაისფორთან” შეხვედრის წინ უკვე იყო დაძაბული სიტუაცია, როდესაც ტრიბუნები გაივსო, ქომაგების ნაწილი კი გარეთ დარჩა.

ცნობილი იტალიური გაზეთი „კორიერე დელო სპორტი” წერს: „ქალაქის მერს კარგად მოეხსენება, რომ თუ რამე არ იღონა 12 აგვისტომდე პრობლემა შეიძლება განმეორდეს, რადგან ოსიმენი და მისი თანაგუნდელები კასტელ დი სანგროში სწორედ ამ დრომდე რჩებიან”.

Radio Crc-ს კორესპონდენტთან საუბარში კარუზომ განაცხადა, რომ „პატიანის” ტევადობა შემდეგი სამი ამხანაგური შეხვედრისთვის („ჟირონასთან”, „აუგსბურგთან” და ლიმასოლის „აპოლონთან”) 5 000-დან 7500-მდე გაიზრდება და ცხადია ახალ ადგილზე ბილეთებიც თვალის დახამხამებაში გაიყიდება.