ვინმე იტყვის ჯერ ადრეაო, მაგრამ ნეაპოლში უკვე სკუდეტოს აღსანიშნავად ემზადებიან. ეს იქნება „აძურის” მესამე ტიტული — ბოლო წარმატებიდან 33 წლის შემდეგ. უკვე ბევრი იწერება იმის შესახებ, თუ რა შეიძლება მოხდეს ქალაქში აპრილსა და მაისში. ერთი ფაქტია, მთელი ნეაპოლი პარალიზებული იქნება. „ბედ ენდ ბრეკფესტის” ტიპის იაფფასიან სასტუმროებს არემონტებენ. აპრილის ბოლოს ყველა, ვისაც ოთახის გაქირავება სურს, სრულ მზადყოფნაში იქნება. ახლა მთავარია ტურისტული ბიზნესით დაკავებულმა ხალხმა გამოიცნოს, თუ რომელ ტურში გაიფორმებენ „პარტენოპეელები” ჩემპიონის ტიტულს.
საქმეში ჩართულია არა მხოლოდ ქალაქის ისტორიული ცენტრი და ესპანური კვარტალი, არამედ არენელა, ვომერო და ფუორიგროტაც — სხვა სიტყვებით სრული ქაოსია.
ამბობენ, რომ განსაკუთრებული დაწოლა 7 მაისზე მოდის, როდესაც „ნაპოლი” ფიორენტინას მასპინძლობს. ამ თარიღისთვის ობიექტების 85% უკვე დაჯავშნულია, რაც შარშანდელთან შედარებით 15%-ით მეტია.
