დინამო აგებს და აგებს

წყალბურთელთა ჩემპიონთა ლიგაში თბილისის „დინამომ“ ზედიზედ მეოთხე მატჩი წააგო. არადა, მეტოქედ ხორვატული „იადრანი“ გვყავდა, რომელსაც შარშან სტუმრად მაგრად ვებრძოლეთ და 13:15 დავმარცხდით, ხოლო თბილისში სულაც 12:11 მოვუგეთ.

გვქონდა იმედი, რომ „დინამო“ წარუმატებელ სერიას შეწყვეტდა, მაგრამ ასე არ მოხდა და ჩვენი გუნდი მოულოდნელად დიდი ანგარიშით დამარცხდა – 7:21. მატჩის ბედი დიდ შესვენებამდე გადაწდა. პირველი მეოთხედი „იადრანმა“ 6:3 კი მოიგო, მაგრამ „დინამომ“ მეორე მეოთხედი სრულად ჩააგდო – რვა ბურთი გაუშვა, თავად ვერ გაიტანა და 3:14 ჩამორჩა. მატჩის შემოტრიალება უკვე შეუძლებელი იყო. მეტიც, „იადრანმა“ დარჩენილი მეოთხედებიც მშვიდად მოიგო. „დინამო“ მომდევნო მატჩს უკვე 2023 წელს გამართავს და 10 იანვარს სერბულ „რადნიჩკის“ ეწვევა.

ავტორის პროფილი

ლუკა თალაკვაძე: ლუკა თალაკვაძე ნამდვილი სარბიელელია. ყველას შემწე, გვერდში მდგომი, ალალი და უსაყვედურო. ჟურნალისტის პროფესიის ქიციც იცის და ქიცმაცურიც.