„ის, რაც ხდება მის თანაგუნდელებს უკვე აღიზიანებთ. რასაკვირველია რონალდუს ფეხბურთელებს შორის თავისი წრეც ჰყავს, მაგრამ დანარჩენები ბრაზდებიან”, — თქვა წყარომ.
მსოფლიოს ხუთგზის საუკეთესო ფეხბურთელი „მანჩესტერ იუნაიტედში” „იუვენტუსიდან” შარშან გადავიდა, ახლა კი გაქცევაზეა. კლუბს მისი გაყიდვა არ უნდა. ვარსკვლავი ამბობს, რომ „იუნაიტედის” ხელმძღვანელებს მისთვის სიტყვა ჰქონდათ მიცემული — თუ გუნდი ჩემპიონთა ლიგაში გამსვლელ ადგილს ვერ მოიპოვებდა, მას არ დააბრკოლებდნენ.
რონალდუს აგენტი ჟორჟე მენდეში კლუბის აღმასრულებელ შეფს რიჩარდ არნოლდს სთხოვდა, მას მხოლოდ თანხა დაესახელებინა და მავანი ინკოგნიტო კლუბი ამ ფულს ციმციმ ჩაურიცხავდა. არნოლდმა რჩევისთვის მანკუნიანელთა მეპატრონეებს ძმებს გლეიზერებს მიმართა, ამერიკელებმა კი ცივი უარი შემოთვალეს.
კრიშტიანუმ „ოლდ ტრეფორდიდან” წასვლის იმედით სეზონისწინა შეკრებაში მონაწილეობა არ მიიღო, ოჯახური პრობლემები მოიმიზეზა და გუნდს მხოლოდ ბოლო ამხანაგურ შეხვედრაში შეუერთდა. ეს გახლდათ მატჩი „რაიო ვალეკანოსთან”, რომელშიც პორტუგალიელი პირველი ტაიმის შემდეგ შეცვალეს და მან, გაბრაზებულმა, სტადიონი თამაშის დამთავრებამდე დატოვა.
შემდეგ, პრემიერლიგის პირველი ტურის შეხვედრაში, „ბრაიტონთან”, ერიკ ტენ ჰაგმა რონალდუ 53-ე წუთზე შეუშვა მოედანზე, მაგრამ თავდამსხმელმა ვერაფერი გააწყო და „იუნაიტედმა” წააგო 1:2.
კლუბსა და ვარსკვლავს შორის დაძაბულობა გრძელდება.
