ჩელსიმ ამაოდ ისადილა

„ჩელსიმ” მორიგი სატრანსფერო ფიასკო განიცადა: „ბარსელონას” ჰოლანდიელმა ნახევარმცველმა ფრენკი დე იონგმა ლონდონელებს განუცხადა, რომ მათთან გადასვლას „მანჩესტერ იუნაიტედში” გადასვლა უჯობს.

„იუნაიტედი” დიდი ხანია დე იონგის გადაბირებას ცდილობს და მას მერე, რაც გუნდის მწვრთნელად მისი თანამემამულე და ყოფილი მწვრთნელი ერიკ ტენ ჰაგი დაინიშნა, საქმე როგორც ჩანს დაიძრა. ტენ ჰაგი დე იონგს „აიაქსში” წვრთნიდა.

როგორც მოგახსენეთ, „ჩელსის” ახალი მეპატრონე ტოდ ბოელი დე იონგის ხელში ჩასაგდებად საგანგებოდ ჩაფრინდა კატალონიაში, მაგრამ ნახევარმცველმა ამერიკელ ბიზნესმენს თავისი პოზიცია გულწრფელად აუხსნა. მან უთხრა, რომ თუ „ბარსელონას” დატოვებს, მხოლოდ „ოლდ ტრეფორდზე” გადაბარგდება.

და მაინც, 25 წლის ვარსკვლავის ინგლისში გადაბარგებას უახლოეს მომავალში არ უნდა ველოდოთ. ჯერ ერთი, „ბარსელონას” დე იონგის 20 მილიონი ევრო მართებს. ეს გახლავთ კოვიდ-პანდემიის დროს გადავადებული ხელფასი და ბონუსები. გარდა ამისა, ადრეც ითქვა, რომ ფეხბურთელს ყველაფერს „კამპ ნოუზე” დარჩენა ურჩევნია. დე იონგი ყოველთვის ამბობდა, რომ „ბარსელონა” მისი ოცნების გუნდი იყო.