ნიკოლაი მიჰაილოვი: შეიძლება წააგო, მაგრამ ასე არა

Nikolay Mihailov, Bulgaria goalkeeper ბულგარეთის ნაკრების კაპიტანი, 33 წლის მეკარე, ბულგარეთის ფეხბურთის ფედერაციის პრეზიდენტისა და წარსულში ცნობილი გოლკიპერის ბორისლავ მიჰაილოვის შვილი ნიკოლაი მიჰაილოვი რაზგრადში საქართველოსთან 2:5 დამარცხებით ცხადია უკმაყოფილო იყო. სოფიის „ლევსკის” კარის დარაჯმა წუხანდელ მარცხს სირცხვილი უწოდა.

„ჩრდილო მაკედონიასთან ცუდად ვითამაშეთ, რაც წესით დღეს უნდა გამოგვესწორებინა, მაგრამ არ გამოვასწორეთ. ყველაფერი ჩვენს საწინააღმდეგოდ მოხდა. იყო ინდივიდუალური შეცდომები, ყოველ ფეხის ნაბიჯზე შიში და დაძაბულობა. თავი ვერ დავიცავით. კლუბში ჩემთვის ამდენი გოლი ნახევარი სეზონის განმავლობაში არ გაუტანიათ. ეს იყო ეროვნული გუნდის სირცხვილი.

პასუხისმგებლობა ფეხბურთელებმა უნდა იკისრონ. ახალგაზრდებმაც, გამოცდილებმაც. განვითარების მაგივრად სულ უკან და უკან მივდივართ. საუცხოო პირობებს გვიქმნიან, ამიტომ უნდა გავაანალიზოთ, რა არის პრობლემა. პრობლემა კი ჩვენშია, ფეხბურთელებში.

ფეხბურთში ბევრია დაუჯერებელი, საშინელი შედეგი. თამაშის ხარისხი შედეგზე უარესი იყო. მატჩი ყოველთვის შეიძლება წააგო, მაგრამ ასე არა. ჩვენ თავიდანვე არასწორად ვიქცეოდით. როდესაც ფეხბურთელები მატჩისთვის მზად არ არიან, წაგება მათი ბრალია. ასე არ უნდა გაგრძელდეს. ამ ფეხბურთელებს მეტი შეუძლიათ. ხვალ ახალი დღე გათენდება და რაღაც უნდა შევცვალოთ.

გადაწყვეტილებას ხელმძღვანელობა იღებს, ჩვენ კი უნდა გავერთიანდეთ და დარჩენილი ორი თამაში რაც შეიძლება კარგად ჩავატაროთ. როდესაც ყველაფერი კარგად მიდის ერთია, მაგრამ პასუხისმგებლობა მაშინ უნდა იტვირთო, როდესაც საქმე ცუდად არის”, — თქვა მიჰაილოვმა.

ბულგარეთის ნაკრები 9 ივნისს გიბრალტარში თამაშობს, 12 ივნისს კი თბილისში ჩამოდის სადაც სირცხვილის მოწმენდას შეეცდება.