სილესენი გამოიძახეს

ჯასპერ სილესენი ნიდერლანდების ნაკრებში ბრუნდება. „ორანიეს“ მწვრთნელმა ლუი ვან გაალმა „ვალენსიას“ 32 წლის მეკარე ეროვნულ გუნდთან კარგა ხნის განშორების შემდეგ გამოიძახა — გასულ ზაფხულს, ევროპის ჩემპიონატის წინ, სილესენს covid 19 შეეყარა და იძულებული გახდა შეჯიბრება გამოეტოვებინა.

ახლანდელ შეკრებაზე, ვან გაალმა სილესენი ბოლო წამს იხმო, რადგან „ეინდჰოვენის“ კარის მცველი იოელ დრომელი გამოაკლდა.

შეგახსენებთ, რომ მიმდინარე სეზონი „ვალენსიამ“ ქართველი მეკარით გიორგი მამარდაშვილით დაიწყო და პირველი ექვსი ტური „ღამურების“ კარს სწორედ ის იცავდა. ამ პერიოდში სილესენი სათადარიგოთა სკამზე იჯდა, მაგრამ შემდეგ მწვრთნელმა ხოსე ბორდალასმა ძელებს შორის გამოცდილი ჰოლანდიელი დააბრუნა და სწორედ ამან მისცა სილესენს „ნარინჯისფერთა“ ბანაკში დაბრუნების შესაძლებლობა.

ჰოლანდიის ნაკრები 13 ნოემბერს პოდგორიცაში მონტენეგროს ხვდება, ხოლო 16 ნოემბერს, როტერდამში ნორვეგიას მასპინძლობს.

აღსანიშნავია, რომ ამ სანაკრებო კვირაში, კარგა ხნის პაუზის შემდეგ, „ვალენსიას“ კიდევ ერთი უცხოელი ფეხბურთელი გამოიძახეს ეროვნულ გუნდში — ფერნანდუ სანტუშმა გონსალო გედეში პორტუგალიის ნაკრებში დუბლინში ირლანდიასა და ლისაბონში სერბეთთან სათამაშოდ იხმო. მატჩები 11 და 14 ნოემბერს გაიმართება.