ატლეტიკოს გაუმართლა და პირველზე დარჩა

„ატლეტიკომ” კინაღამ მორიგი ორი ქულა დაკარგა — 90-ე წუთზე, „ელჩეს” ნახევარმცვლემა ფიდელ ჩავესმა პენალტი ვერ გაიტანა. მან ძელს გაარტყა ბურთი და დიეგო სიმეონეს გუნდი ლა ლიგის ცხრილის სათავეში ორქულიანი უპირატესობით დატოვა. „მატრასების მკერავებმა” 1:0 გაიმარჯვეს.

„დღეს აუცილებლად უნდა მოგვეგო,” — თქვა მატჩის ერთადერთი გოლის ავტორმა მარკოს ლორენტემ. მას პასი იანიკ კარასკომ მიაწოდა, თავად გოლი კი რიკოშეტით გავიდა.

ლუის სუარესს ამ შეხვედრაში ორი გოლი არ ჩაუთვალეს.

„ელჩე” გახდა მესამე გუნდი, რომელმაც მიმდინარე სეზონში „ატლეტიკოს” პენალტი ვერ გაუტანა. პირველი ორი იყვნენ „ალავესი” და „სევილია”.

შემდეგი შეხვედრა მადრიდელებს „კამპ ნოუზე”, „ბარსელონასთან” აქვთ.