ტუხელი ბნელ ოთახში

დღეს, საქართველოს დროით ცხრის ნახევარზე, პრემიერლიგაში, „ჩელსი” „მანჩესტერ იუნაიტედს” მასპინძლობს. „იუნაიტედი” მეორეზეა, „ჩელსი” — მეხუთეზე. მათ შორის 6 ქულაა. დასავლეთლონდონელთა გერმანელი მწვრთნელისთვის, თომას ტუხელისთვის კი ეს აგრეთვე იმ გუნდთან შეხვედრაა, რომელმაც კარიერაში ყველაზე მწარე მარცხი აწვნევინა.

ლაპარაკია 2019 წლის ამბავზე. მაშინ ტუხელი ჯერ კიდევ „პარი სენ ჟერმენის” თავკაცი იყო და ჩემპიონთა ლიგის მერვედფინალში განგებამ „მანჩესტერ იუნაიტედს” შეახვედრა. 13 თებერვალს გუნდები მანჩესტერში, „ოლდ ტრეფორდზე” შეხვდნენ ერთმანეთს. ტუხელის გასახარად, მისმა გუნდმა 2:0 მოიგო. ეს ცალი ფეხით მეოთხედფინალში გასვლას ნიშნავდა, მაგრამ მოხდა სენსაცია: 7 მარტს, პარიზში, საპასუხო მატჩში, „იუნაიტედმა” 3:1 გაიმარჯვა და პარიზელები შეჯიბრებას გამოთიშა.

ტუხელი: „გულწრფელად გეტყვით, მთელი ორი დღის განმავლობაში სიბნელეში ვიჯექი და ვერავის ველაპარაკებოდი. მხოლოდ იმ საშინელ წაგებაზე ვფიქრებდი. ალბათ, ეს იყო ჩემს კარიერაში ყველაზე მწარე მარცხი, რადგან ის არსაიდან მოვიდა. ასეთი უმიზეზო წაგება არც მანამდე მინახავს და არც მერე”.

– გამოდის, ლუზერი იყავით? – ჰკითხეს ტუხელს ინგლისელმა ჟურნალისტებმა.

„არა მგონია, რადგან იმ დონეზე თამაშს ბარეორი ოცნებობს”.

თომას ტუხელი „ჩელსის” იანვარში ჩაუდგა სათავეში და ახალ ამპლუაში „მანჩესტერ იუნაიტედს” პირველად ხვდება.

„კარგად ვიცით რასაც უნდა ველოდოთ მანჩესტერელთაგან. ეს არის გუნდი, რომელსაც ნებისმიერ წამს შეუძლია ცუდ დღეში ჩაგაგდოს. მათ ფრთიდან ფრთაზე შესანიშნავად გადააქვთ ბურთი. როდესაც „იუნაიტედი” კონტრშეტევაზე წამოვა, თავის დაცვა ძალიან ძნელი იქნება”, — თქვა ტუხელმა მატჩისწინა პრეს-კონფერენციაზე.