პსჟ რეალს დაეჯახება

ესპანური „მარკას“ ინფორმატორს თუ ვენდობით, პსჟ სერიოზულად აპირებს ერლინგ ჰოლანდისთვის ბრძოლაში ჩართვას. პარიზელებს ერთბაშად ორი თავსატკივარი აქვთ: კილიან მბაპე წლეულს ან გაისად აუცილებლად გაექცევათ მადრიდის „რეალში“ და ნეიმარს კი „ბარსელონაში“ დაბრუნება ამოუჭრია გულში.

ამ ორ ფეხბურთელზე შორსმიმავალ სტრატეგიას ვერ ააგებ, ახალგაზრდა ნორვეგიელი კი დიდწილად დააბალანსებდა პსჟ-ს შეტევის ხაზს.

შეგახსენებთ, რომ ერლინგ ჰოლანდის ტრანსფერი გასულ ზამთარს „დორტმუნდს“ 20 მილიონი ევრო დაუჯდა. ერლინგმა ფურორისთვის ორიოდე თვე იკმარა და 12 შეხვედრაში 13-ჯერ დალაშქრა მეტოქეთა კარი.

კილიან მბაპე ერთია და, ნორვეგიელი სუპერბიჭუნაც სურს ფლორენტინო პერესს. ორი კლუბის ჯიუტი პრეზიდენტების ჯახს სულ მცირე ერთი გამარჯვებული მაინც ეყოლება – დორტმუნდელები დახარჯულ 20 მილიონში ხუთმაგზე ნაკლებს არ დათანხმდებიან.

ავტორის პროფილი

გიორგი ნოზაძე: მას შეეძლო, დილის 11 საათისთვის გაზეთის ორი გვერდი მზად ჰქონოდა და გადაერეკა თანამშრომლებისთვის - ნუ შეწუხდებით, სამსახურში ნუღარ მოხვალთ, საქმე გაკეთებულია. ფეისბუკის ნამდვილი ფეისი. ის გახლავთ სოციალურ ქსელში "მოამბეც" და "ვრემიაც".