დე ლიხტი ყველის ნაჭერია, იუვენტუსი კი ჰარვარდი

მატეის დე ლიხტის აგენტმა, მსოფლიოს ერთ-ერთმა ყველაზე გავლენიანმა საფეხბურთო საქმოსანმა და, რაა დასამალი, სკანდალურმა პიროვნებამ, მინო რაიოლამ „ბარსელონას” შეუტია. მას კატალონიელთა ბოსტანში კენჭების სროლა სჩვევია ხოლმე.

ჰოლანდიური Voetbal International-თვის მიცემულ ინტერვიუში იტალიელმა თქვა, რომ „ბარსელონა” დე ლიხტს სათანადოდ ვერ აფასებდა და ის ფრენკი დე იონგის ხურდა ეგონა.

„ბარსელონაში ფიქრობდნენ, რომ რაკი ფრენკი დე იონგს ყიდულობდნენ, მატეის დე ლიხტსაც გამოკრავდნენ ხელს. როგორც ჩვენში იტყვიან, ყველის ნაჭერი ეგონათ. საკითხს არასწორად უდგებოდნენ. მათი აზრით, ისეთი ფეხბურთელი როგორიც პიკეა, ახალმოსულს თავის ადგილს დაუთმობდა?

სხვათა შორის, ჰოლანდიაშიც ფიქრობდნენ, რომ დე ლიხტი ვალდებული იყო „ბარსელონაში” გადასულიყო, ამ ქვეყანაში „ბარსა” ჰოლანდიურ კლუბად მიაჩნიათ. უცხოურად კი ვერ აღიქვამენ.

არადა, დე ლიხტისთვის ფული მთავარი არ არის. მას თამაში უნდა. „იუვენტუსს” კი მისი ყიდვა ჯერ კიდევ ერთი წლის წინ სურდა. მაშინ დე ლიხტმა მითხრა: მინო, მე დაცვითი ფეხბურთის ჰარვარდში მინდა ვისწავლო. და ამიტომაც ავირჩიეთ „იუვე”. ჯერ უმაღლესია დასამთავრებელი”.