ნავასი მადრიდში აღარ დაბრუნდა

„რეალმა” როგორც ჩანს გადაწყვიტა „ბარსელონას” არაფერში ჩამორჩეს და როდესაც მისი მთავარი კონკურენტი ქულებს კარგავს, მანაც დაკარგოს — „თეთრებმა” ვილიარეალში 2:2 ითამაშეს. შეგახსენებთ, რომ წინა დღეს, პამპლონაში, ზუსტად ასეთი ანგარიშით (2:2) დაასრულა თავისი შეხვედრა „ბარსამ” „ოსასუნასთან”.

„ვილიარეალთან” მადრიდელთა სათადარიგო მეკარე გახლდათ ცნობილი კეილორ ნავასი, რომელიც მატჩის შემდეგ „რეალთან” ერთად ესპანეთის დედაქალაქში არ დაბრუნებულა. ის „ესტადიო დე ლა კერამიკას” გასახდელში თანაგუნდელებს დაემშვიდობა და პარიზს გაემგზავრა, რადგან… ამიერიდან „პარი სენ ჟერმენის” ფეხბურთელია. ამ ამბავს სულ მალე ოფიციალურად გამოაცხადებენ.

„მარკა“ წერს, რომ კლუბებმა 32 წლის კოსტა რიკელის ტრანსფერის შესახებ ხმამაღლა ჯერ იმიტომ არ თქვეს, რომ ესპანეთისა და საფრანგეთის ჩემპიონატებში მორიგი თამაშების მშვიდად ჩატარება უნდოდათ. არ სურდათ გულშემატკივართა გონება სხვა ცნობითაც დაეკავებინათ. „პარი სენ ჟერმენმა” პარასკევს მეცში მოიგო 2:0.

პსჟ-მ ნავასი 15 მილიონ ევროდ იყიდა.

ნავასის საპირისპირო მიმართულებით, პარიზიდან მადრიდისკენ, ერთი სეზონით, მოემგზავრება 26 წლის ალფონს არეოლა, რომელმაც საეჭვოა შემადგენლობიდან ტიბო კურტუა ამოაგდოს და სავარაუდოდ სეზონს სათადარიგოთა სკამზე გაატარებს. მისი წასვლის შემდეგ კი „რეალის” მეორე მეკარეობა 20 წლის უკრაინელ ანდრიი ლუნინს ჩაბარდება.

როდის წარუდგენენ არელოას მადრიდელ გულშემატკივარს უცნობია, რადგან ჯერჯერობით გოლკიპერი საფრანგეთის ნაკრებშია გამოძახებული.