ქართველი ილუზიონისტი კასტელ დი სანგროში

„ნაპოლი” სეზონისწინა შეკრებას კასტელ დი სანგროში აგრძელებს. სხვადასხვა ნეაპოლურმა საიტებმა გუნდის აბრუცოს პროვინციაში ჩასვლის ამსახველი ფოტოები გამოაქვეყნეს, რომელთაგან ერთმა გამორჩეული ყურადღება მიიპყრო. ამ ფოტოზე „აძურის” ქართველი გარემარბი ხვიჩა კვარაცხელია დიდი, კლასიკური ჩემოდნით მოდის, რის გამოც მავანმა გულშემატკივარმა ის ილუზიონისტს შეადარა:

„აი, ქართველი ილუზიონისტი დიდი ჩემოდნით, რომელშიც ასისტენტი უზის. ის თავის საოცარ ნომრებს ამ ასისტენტის დახმარებით აკეთებს”, — იხუმრა ქომაგმა და ეს ხუმრობა იტალიაში ბევრმა აიტაცა.