ფარეხიდან ფერარი გამოიყვანა

Takumi Minamino capped an impressive display by scoring the equaliser at Southampton „ლივერპულმა” „საუთჰემპტონს” 2:1 მოუგო და „მანჩესტერ სიტის” ერთი ქულით ჩამორჩება. დარჩა ბოლო ტური.

საუთჰემპტონში იურგენ კლოპმა შაბათის (ფეხბურთის ასოციაციის თასის) ფინალთან შედარებით ცხრა კაცით გადასხვაფერებული შემადგენლობა ათამაშა. მერსისაიდელები თავიდან ჩამორჩნენ — მე-13 წუთზე ნეითან რედმონდმა გახსნა ანგარიში, მაგრამ 27-ე წუთზე ტაკუმი მინამინომ გაქვითა, 67-ზე კი ჟოელ მატიპმა გამარჯვების გოლი შეაგდო.

Harvey Elliott made his first start since the FA Cup win away at Nottingham Forest in March კლოპმა თქვა: „თამაშით ძალიან კმაყოფილი ვარ. ამაღელვებელი იყო. ეს ბიჭები ავტოფარეხში მიყუჩებული ფერარისავით იყვნენ. გამოვარდნენ გარეთ და აი, ასეთი რაღაც გააკეთეს. აღარც კი მახსოვს, როდის ვათამაშე ბოლოს ჰარვი ელიოტი; კერტის ჯონსი ათასში ერთხელ გადის მოედანზე; ტაკუმი მინამინო უფრო ხშირად რომ არ თამაშობს, დანაშაულია. ოქსლეიდ-ჩემბერლენი დღესაც ვერ ჩაერთო საქმეში, არადა მშვენიერ ფორმაშია.

ხანდახან ამ ბიჭების მდგომარეობა მართლა ძალიან ძნელია. ყველაფერი, რაც ამ სეზონში ხდება, მათი დამსახურებაა. ისინი გამორჩეულები არიან და ეს დღესაც დაამტკიცეს.

ამ შეხვედრაში შემადგენლობა ცხრა კაცით შევცვალე და გაამართლა. რომ არ გაემართლებინა, ჩემი ბრალი იქნებოდა, მაგრამ გაამართლა და ეს ბიჭების დამსახურებაა.

ახლა ბოლო ტურია დარჩენილი. მე რომ „სიტის” ადგილზე ვიყო, თავს ჩემპიონად ნამდვილად არ ვიგრძნობდი. ერთი წამით კაცს შეიძლება მართლა გაგკრას გონებაში, რომ „სიტი” უკვე ჩემპიონია, მაგრამ ეს ფეხბურთია, ფეხბურთში კი ყველაფერი ხდება. ჩვენ ჩვენსას ვცდით. გამორიცხული არაფერია. შინ ვთამაშობთ. ატმოსფერო ფანტასტიკური იქნება”.

შეგახსენებთ, რომ იანვრის შუაში „მანჩესტერ სიტი” მდევარს 14 ქულით უსწრებდა.

22 მაისს „ლივერპული” „ვულვერჰემპტონს” მასპინძლობს, „მანჩესტერ სიტი” კი „ასტონ ვილას”.