იტალიის ჩემპიონატი ჯერ არ განახლებულა, მაგრამ იქაური მედია უკვე შესაძლო შეთქმულების თეორიაზე წერს. ამ თეორიის „ავტორი“ სერია B-ს ლიდერი „ბენევენტო“ გახლავთ.
ცოტა შორიდან დავიწყოთ: იტალიაში შეჩერებული ჩემპიონატი განახლების პროცესშია. აპენინებზე, სხვა დიდ ევროპულ ქვეყნებზე მკაცრი რეგულაციებია – ვირუსის დადასტურების შემთხვევაში, კარანტინში მთელი გუნდი უნდა წავიდეს და არამხოლოდ ინფიცირებული. თუ ასე მოხდა, ჩემპიონატი, ფაქტობრივად, ჩაიშლება.
გადავიდეთ მეორე საკითხზე: პარასკევს კლუბებმა წილი ყარეს და შეთანხმდნენ, რომ თუ ჩემპიონატი ჩაიშლება, შედეგები საერთოდ გაუქმდება.
სწორედ ეს აღელვებს „ბენევენტოს“ უფროსობას და აცხადებენ, რომ სერია A-ს ორი გუნდი კლუბში არსებულ კორონავირუსს მალავს, ჩემპიონატის განახლების შემდეგ კი ამ ინფორმაციას გაამხელს და ტურნირს ჩაშალის.
იტალიური მედია ფიქრობს, რომ „ბენევენტოს“ ეჭვი საფუძვლიანია. საქმე ის არის, რომ სერია A-ს აუტსაიდერებს, რომელთაც დაქვეითება ემუქრებათ, ტურნირის განახლება არ სურდათ. მათ უნდოდათ, რომ წლევანდელი სეზონი გაუქმებულიყო და ამ გზით ადგილი სერია A-ში ადგილი შეენარჩუნებინათ.
„ბენევენტოსიც“ გასაგებია – გუნდი სერია B-ს 20 ქულიანი უპირატესობით ლიდერობს და შემდეგ სეზონში სერია A-ში თამაში, ფაქტობრივად, გარანტირებული აქვს. თუმცა, თუ ჩემპიონატი ჩაიშალა, ამ კლუბის მომავალი გაურკვეველი იქნება. ქალაქის მერმა უკვე მოითხოვა გამოძიების დაწყება.
სერია A-ს ცხრილის გასავარდნ ზონაში ამჟამად ლეჩე (25 ქულა), სპალი (18) და ბრეშა (16) არიან.