მესის წინააღმდეგ მხოლოდ ერთხელ დაჯარიმდნენ

მას მერე რაც გაირკვა, რომ ჩემპიონთა ლიგის ნახევარფინალში ერთმანეთს „ლივერპული” და „ბარსელონა” უნდა შეხვედროდნენ, ბევრმა თქვა გუნდებს შორის ერთი დიდი განსხვავებაა და მას ლეო მესი ჰქვიაო. ეს აზრი ისმოდა პრეს-კონფერენციებზე, საიტებზე, ტელეგადაცემებში…

პირველ შეხვედრაში, რომელიც „კამპ ნოუზე” გაიმართა, არგენტინელმა მართლაც გამოიჩინა თავი. მან ორი გოლი შეაგდო — ერთი უბადლოდ შესრულებული საჯარიმო დარტყმით — მაგრამ საპასუხო შეხვედრაში ადამიანი-განსხვავება მოედანს როგორც სჩვევია, ისე არ დატყობია.

გთავაზობთ საპასუხო შეხვედრაში, „ენფილდ როუდზე”, ლეო მესის ნაჩვენები თამაშის სტატისტიკას:

ყველაზე მეტად ყურს ჭრის ის ფაქტი, რომ მესის 17-ჯერ წაართვეს ბურთი. ბარსელონელთაგან მასზე უარესი შედეგი მხოლოდ ჟორდი ალბას ჰქონია — 21 წართმევა.

სტატისტიკოსების აზრით, მესის მოკრძალებულ თამაშზე ჯარიმების რაოდენობაც მეტყველებს. გინდ დაიჯერეთ, გინდ არა, მესის წინააღმდეგ მთელ შეხვედრის განმავლობაში მხოლოდ ერთხელ დაჯარიმდნენ — 66-ე წუთზე. ეს ის ეპიზოდია, როდესაც ჯოელ მატიპს ყვითელი ბარათი ამოუღეს.

თუმცა, კარში დარტყმებით არგენტინელმა თანაგუნდელთა შორის ყველაზე მეტად იყოჩაღა: ოთხი დარტყმიდან ორჯერ ჩარჩოში დაუმიზნა, ორჯერ კი ააცილა.

რაც შეეხება პასებს: „ბარსას” კაპიტანმა 35 სწორი პასი გადააწოდა, 6 შემთხვევაში კი ბურთი თანაგუნდელს ვერ მისცა.

ზოგადად, რასაკვირველია, ეს საღამო ლეო მესისთვის იღბლიანი არ იყო.

ისევე, როგორც მთელი „ბარსელონასთვის”, რომელმაც პირველ შეხვედრაში მოგებული 3:0 ვერ შეინარჩუნა და საპასუხოში 0:4 წააგო.

ავტორის პროფილი

ირაკლი ნინიძე: ლეგენდის თანახმად, ამხანაგი ირკალი ნინიძე „სარბიელის“ ავტორია გასული საუკუნიდან, თუმცა ზუსტად რომელი წლიდანაა გადაჯაჭვული მისი ბედი „სარბიელთან“, ლეგენდა დუმს. რატომ დუმს ? იმიტომ, რომ ამხანაგ ნინიძეს არ უყვარს მოლაპარაკე ლეგენდები. მას უყვარს სპორტი, წერა და სპორტზე მარჯვედ წერა...