როგორც მოსალოდნელი იყო

ISTANBUL, TURKEY - SEPTEMBER 30: (THE SUN OUT. THE SUN ON SUNDAY OUT) Alisson Becker of Liverpool receives medical treatment during the UEFA Champions League 2025/26 League Phase MD2 match between Galatasaray A.S. and Liverpool FC at Ali Sami Yen Spor Kompleksi on September 30, 2025 in Istanbul, Turkey. (Photo by Liverpool FC/Liverpool FC via Getty Images) შედგა გიორგი მამარდაშვილის დებიუტი ჩემპიონთა ლიგაში. როგორც მოსალოდნელი იყო საქართველოს ნაკრების მეკარეს შანსი ალისონ ბეკერის ტრავმის წყალობით გამოუჩნდა. სხვა შემთხვევაში ამთავითვე ლეგენდად გამოცხადებულ ბრაზილიელს არავინ შეცვლიდა და გიორგის ინგლისის რომელიმე თასის მორიგი შეხვედრის ლოდინი მოუწევდა. მამარდაშვილის დებიუტი შედგა იმ შეხვედრაში, რომელიც მერსისაიდელებმა წააგეს – სტამბოლში, „გალათასარაისთან’’ (0:1) – და რომელშიც საკუთარი მცველების მიერ მიგორებული ბურთების სწორად დაბრუნებას თუ არ ჩავთვლით, სხვა საქმე არ ჰქონია, მაგრამ მთავარია, რომ ფაქტი შედგა.

შეხვედრის ერთადერთი გოლი მე-16 წუთზე ვიქტორ ოსიმენმა გაიტანა.

საიტმა liverpoolecho-მ გიორგის 6 ქულა დაუწერა და სწორედ ის აღნიშნა, რომ იმ 34 (+8) წუთში, რაც მან მოედანზე დაჰყო, საქმე არ ჰქონია. Flashscore-ის შეფასება გახლდათ 6.2; sofascore-ის ― 6.5; whoscored-ის ― 6.0.

მატჩის შემდეგ ლივერპულელთა მწვრთნელმა არნე სლოტმა ალისონის ტრავმაზე ილაპარაკა.

„როდესაც ის სპრინტით უკან გაიქცა, რაღაც იგრძნო. მე ექიმი არ ვარ და ზუსტად ვერაფერს გეტყვით, მაგრამ ჩვეულებრივ, როდესაც ფეხბურთელი უკან გარბის, სირბილში დისკომფორტს გრძნობს და ეცემა, მერე მოედანზე ვეღარ ბრუნდება. 99.9 პროცენტით შემიძლია გითხრათ, რომ ის შემდეგ შეხვედრაში (შაბათს, „ჩელსისთან’’) მონაწილეობას ვერ მიიღებს. მეტიც, მე ვიტყოდი, რომ 100 პროცენტით ვერ ითამაშებს’’, ― თქვა სლოტმა.

შესაბამისად, 4 ოქტომბერს, საქართველოს დროით 20 საათსა და 30 წუთზე „ლივერპულის’’ კარში კვლავ გიორგი მამარდაშვილს უნდა ველოდოთ.