მართლა კითხულობთ, რომ ფედერაცია რა შუაშია?

გული დაგვწყდება, მაგრამ სრულებით არ გაგვიკვირდება, ახალგაზრდა გულშემატკიკვარს არაფერი რომ სმენოდეს ლანჩხუთის „გურიაზე“. არადა, მართლა რა უნდა სმენოდეს, როდესაც თავად ლანჩხუთელებსაც ამ გუნდის არსებობას, წინა საუკუნეში, სამ თვეში აშენებული სტადიონი (უფრო სწორად, რაც მისგან შემორჩა) და ამ პატარა რაიონული ცენტრის გოგონათა ამავე სახელის მქონე გუნდიღა ახსენებთ.

არა, „გურია“ ახლაც არსებობს, უბრალოდ საქართველოს ჩემპიონატის მეოთხე ლიგაში თამაშობს და მკრეხელობაში თუ არ ჩაგვითვლით, ღმერთმაც არ იცის, როდის ამოვა უმაღლესში.

არადა…

1989 წელი. 5 ნოემბერი. 6 თვე და 26 დღე 9 აპრილიდან. საბჭოთა კავშირის ჩემპიონატის პირველი ლიგის ბოლო ტურის შეხვედრაში „გურია“ ალმატის „კაირათს“ 3:1 ამარცხებს და ეს პატარა რაიონული ცენტრი საკავშირო უმაღლეს ლიგაში აღზევებას ზეიმობს. კი, ისტორიულ მოვლენათა გამო, ქართული კლუბები სულ მალე საკავშირო პირველობას უარს ეტყვიან, მაგრამ ის სხვა ისტორიაა. ეს ამბავი კი აქ „კაირათის“ გამო გავიხსენეთ.

✔️ დღეს „გურია“ საქართველოს ჩემპიონატის მეოთხე ლიგაშია.

✔️ დღეს ალმატის „კაირათი“ ჩემპიონთა ლიგაში ხვდება „სპორტინგს“, „რეალს“, „ინტერს“, „არსენალს“…

და ამ ყველაფრის გახსენებასაც, ცხადია, თავისი მიზეზი აქვს: ლევან კობიაშვილის ამასწინანდელი სიტყვები, რომ რა კავშირშია ფეხბურთის ფედერაცია ქართული კლუბების კატასტროფულ მდგომარეობასთან…

ეგებ ჩვენი მკითხველის ნაწილიც ფიქრობს, რომ მართლა რა კავშირშია და ყველაფერზე მხოლოდ თავად კლუბები არიან პასუხისმგებლები?