ჩვენი ფეხბურთი ერთ განცხადებაში

აი, ხომ მეტისმეტად უცნაურია განცხადება, რაც „სპაერმა“ გაავრცელა, მაგრამ გვერწმუნეთ, არაფერია უფრო ადეკვატური ქართული საკლუბო ფეხბურთის დღევანდელი ყოფის მოსაყოლად.

აბა, წარმოიდგინეთ, ბევრი წლის მერე, შთამომავლობა რომ გკითხავთ, თქვენ დროს როგორი იყო ჩვენი ფეხბურთიო, უკეთესს რას წააკითხებთ?

აქამდე ერთხელ გვახსენდება მსგავსი რამ, როცა „საბურთალომ“ (სანამ „იბერიას“ დაირქმევდა) გულშემატკივრებს უთხრა, თამაშზე არ მოხვიდეთო… არ გჯერათ ან ვერ იხსენებთ? ინებეთ.

მაშინ მიზეზი არანაკლებ „ეგზოტიკური“ იყო: თქვენ საქციელზე თავს ვერ დავდებთო – გამოუცხადა კლუბმა საკუთარ ქომაგს.

ახლა კიდევ „სპაერმა“ – თავის ისტორიულ შეხვედრაში – გუნდი პირველ მატჩს ატარებს ევროთასზე საკუთარ კედლებში და…

თუმცა, კაცმა რომ თქვას, საკუთარი კედლები, ცოტა არ იყოს, ხმამაღალი ნათქვამი გამოგვივიდა – მესხის სათადარიგო მოედანს, სადაც მატჩი გაიმართება, კედლები (ტრიბუნები) მხოლოდ ერთი აქვს.

და ყველაფრის მიუხედავად, „სპაერს“, ცხადია, სრულიად გულწრფელად ვუსურვებთ წარმატებას!