გრაციანი: ხვიჩასთან დაკავშირებით კონტეს დავურეკავ და ვეტყვი სისულელე არ ჩაიდინოს

World Cup Final, Madrid, Spain, 11th July Italy 3 v West Germany 1, West Germany's Bernd Foerster and Italy's Francesco Graziani race for the ball — მსოფლიოს 1982 წლის ფინალი. გრაციანი უტევს გფრ-ს ნაკრების კარს.

ფრანჩესკო გრაციანი 1982 წლის იტალიელი მსოფლიოს ჩემპიონია, რომელიც ყველაზე მეტად „ტორინოში” თამაშით არის ცნობილი, მაგრამ 80-იან წლებში „ფიორენტინას”, „რომასა” და „უდინეზეს” თავდამსხმელიც იყო. 71 წლის გრაციანიმ რადიო Kiss Kiss-თან ინტერვიუში „ნაპოლის” შესახებ ილაპარაკა და კერძოდ ხვიჩა კვარაცხელიას შეეხო.

„კვარაცხელია? თუ ანტონიო კონტეს ის თავისი პროექტის ნაწილად მიაჩნია, მაგრამ თავდამსხმელის უკან უპირებს გადაყვანას, მე მას დავურეკავ და ვეტყვი, სისულელე არ გააკეთოს. მან ის შუაში, ფორვარდის უკან არ უნდა დააყენოს, თორემ გააფუჭებს. ხვიჩამ ან 4-3-3 ან 4-2-3-1 სქემაში უნდა ითამაშოს. მწვრთნელს შეიძლება განსხვავებული იდეები ჰქონდეს, მაგრამ ფეხბურთელი არ უნდა დაამახინჯოს: მან სისულელე არ უნდა ჩაიდინოს, თუ კვარას თავის გუნდში მოიაზრებს, მაშინ მარცხენა ფრთაზე უნდა დატოვოს. როგორც კი 20 მეტრით შუაში შეიყვანს, გაანადგურებს”, — თქვა გრაციანიმ.

შეგახსენებთ, რომ საქართველოს ნაკრების მწვრთნელი ვილი სანიოლი კვარაცხელიას სწორედ მეორე თავდამსხმელის პოზიციაზე ანუ შუაში ათამაშებს და კმაყოფილია.