მოჯი: ოსიმენი ნაპოლიში აღარ არის

Khvicha Kvaratskhelia and Victor Osimhen of SSC Napoli during the Serie A football match between SSC Napoli and Torino FC at Diego Armando Maradona... „რომას”, „ლაციოს” „ტორინოს”, „ნაპოლისა” და „იუვენტუსის” ყოფილ აღმასრულებელ დირექტორს, იტალიური და მსოფლიო ფეხბურთის ცნობილ ადმინისტრატორს, კვაჭსა და საქმოსანს, 87 წლის ლუჩანო მოჯის Televomero ელაპარაკა. „ინტერისა” და „ნაპოლის” ბოლო ტურის შეხვედრაზე (1:1) მან ასე თქვა:

„ნეაპოლელებმა არაფრისმთქმელი ფეხბურთი გვაჩვენეს. ეს იყო იმ ორი გუნდის დაპირისპირება, რომელთაც ამ დღეს საუკეთესო თამაში ვერ შემოგვთავაზეს. ორივეს ჩემპიონთა ლიგის შეხვედრა ჰქონდა ახალი ჩატარებული, მაგრამ „ნაპოლიმ” ერთი დღით მეტი დაისვენა, ხოლო „ინტერმა” ჩემპიონთა ლიგის ხსენებულ შეხვედრაში დამატებითი დრო ირბინა და პენალტები დაარტყა. „აძური” 80 წუთი აგებდა, ბოლოს კი სტანდარტული მდგომარეობიდან გაქვითა ანგარიში.

ბურთის ფლობა? ეს სატყუარაა და მეტი არაფერი („ნაპოლი” – 51%), თუმცა ეს უპირატესობა თავის დასამშვიდებლად გამოდგება. მეორე ტაიმში „ნაპოლიმ” დაინახა, რომ მეტოქეს გაუჭირდა და სცადა ამით ესარგებლა. რაც შეეხება ფრანჩესკო კალცონას, ის პრობლემის წინაშე დგას — სლოვენიის ნაკრებში წავიდა და ნეაპოლში ათი დღე არ იქნება.

ვიქტორ ოსიმენი კი, მერწმუნეთ, „ნაპოლის” ფეხბურთელი აღარ არის. აღარც გონებით არის გუნდში და აღარც სხეულით. მას ან პრემიერლიგის რომელიმე კლუბი იყიდის, ან „რეალი”. საკმარისია, რომელიმე მათგანმა წინადადებით მიმართოს და ჩათვალეთ, რომ წასულია”.