ჟელინსკი გაგიჟდა?

Zielinski, just to stay in Naples, his salary is almost halved (Gazzetta) ბოლო ინფორმაციით, პიოტრ ჟელინსკი „ნაპოლიში” ნახევარ ხელფასზე რჩება. ეს ცნობა „გაძეტა დელო სპორტის” ფურცლებიდან მაურიციო ნიკიტამ გაავრცელა.

ზემოთ თქმული ოფიციალურად ჯერ არ დადასტურებულა, მაგრამ ფაქტია — პოლონელს ისე სურს „აძურიში” დარჩენა, რომ საუდის არაბეთიდან და „ლაციოდან” მიღებულ სარფიან შეთავაზებებზე უარი თქვა.

ჟელინსკის ახლანდელი კონტრაქტი 2024 წლის ივლისამდეა ძალაში. ჯერჯერობით მისი ხელფასი წელიწადში 4,5 მილიონი ევრო გახლავთ. მაურიციო ნიკიტას თქმით ხელშეკრულება გადაიწერება და დაფიქსირდება, რომ პოლონელი „მარადონაზე” 2026 წლამდე დარჩება და წელიწადში… 2,5 მილიონ ევროს მიიღებს. რატომ თანხმდება ნახევარმცველი ასეთ პირობებზე უცნობია, მაგრამ ყველას კლუბის პრეზიდენტის აურელიო დე ლაურენტისის სიტყვები გაახსენდა: „ხელშეკრულებათა განახლების პროცესი გრძელდება. ახლა გამოჩნდება ვის შესტკივა გული ჩვენს გუნდზე და ვის სხვა ნაპირებისკენ გაურბის თვალი”.