25 წლის ბრაზილიელი ნახევარმცველი არტურ მელო „იუვენტუსს” აღარ სჭირდება. ტურინის კლუბმა ყოფილ ბარსელონელს კარი გაუღო და ის კარიერის გაგრძელებისთვის კარგ ვარიანტს ელოდება. ბოლო ცნობების თანახმად, მელოს გადაბირებით ესპანური კლუბი, გიორგი მამარდაშვილის „ვალენსია” დაინტერესდა. „ღამურები” უკვე მისჯდომიან „ბებერი ქალბატონის” წარმომადგენლებთან მოლაპარაკებათა მაგიდას.
ამ ზაფხულში „ვალენსიამ” ჯერჯერობით ერთადერთი ფეხბურთელი სამუ კასტელეხო დაიმატა, რაც აშკარად ცოტაა. მელოს შეძენას წინ არაფერი უდგას, მაგრამ არის ერთი უხერხულობა: მას ევროკავშირის პასპორტი არ აქვს და „ღამურებს” მოუწევთ არა-ევროკავშირელის ადგილი გამოუყონ.