იტალია სიურპრიზია

ცნობილმა მწვრთნელმა კარლო ანჩელოტიმ, რომელიც ამ ზაფხულს „რეალს” ჩაუდგა სათავეში, იტალიურ Il Giornale-ს ინტერვიუ მისცა, სადაც მიმდინარე ევრო 2020 გაარჩია.

„ესპანეთი, საფრანგეთი და გერმანია ძრავებს ახურებენ. საფრთხილო გუნდია ინგლისიც, რომლის შემადგენლობაში ჩემპიონთა ლიგის ფინალის ექვსი მონაწილე თამაშობს.

იტალიას რთული ბადე ერგო. ის მეოთხედფინალში ბელგიას ან პორტუგალიას შეხვდება, განშტოების მეორე მხარეს კი უფრო მარტივად არის საქმე. ამიტომაც ვფიქრობ, რომ ნიდერლანდები ოთხეულში უეჭველად შევლენ”.

შემდეგ, ანჩელოტის ევრო 2020-ის ვარსკვლავების შესახებაც ჰკითხეს.

„ბელგიას ჰყავს ლუკაკუ, საფრანგეთს მბაპე, პორტუგალიას მარგალიტი — რონალდუ, იტალიაში კი ძნელია ვინმეს გამორჩევა და ეს ამ გუნდის დიდი უპირატესობა მგონია.

იტალია ნამდვილი სიურპრიზია, ევროპის ჩემპიონატის სიახლე. ის ყოველგვარი გამოთვლების გარეშე შემტევ ფეხბურთს თამაშობს, ჰყავს გამოცდილი დაცვა და ენთუზიაზმით აღსავსე სწრაფი, შემტევი ახალგაზრდობა. მე ვხედავ ერთსულოვან ჯგუფს, რომელიც მკაფიოდ გრძნობს მიზანს და მანჩინის იდეებს, რომლებსაც მწვრთნელი აგერ უკვე სამი წელიწადია ასხამს ხორცს.

და ბოლოს, ამ ჩემპიონატზე სხვა ატმოსფეროა, რაც ტრიბუნაზე მაყურებლის დაბრუნებამ განაპირობა”.