მადრიდული გოლი ლონდონში

ინგლისში ხუმრობენ, გარეთ ბეილი სუპერვარსკვლავიდან სუპერსათადარიგოდ იქცაო.

ორიოდ კვირის წინ, როდესაც უელსელი „რეალიდან” „სფურზში” დაბრუნების შემდეგ პირველად შევიდა მოედანზე, ასეთი რამ არავის უთქვამს. იმ დღეს ეფექტური დაბრუნების ოცნება კოშმარად იქცა: „ტოტენჰემი” „ვესტ ჰემს” 3:0-ს უგებდა და თამაში 3:3 დასრულდა.

„ბრაიტონთან” შეხვედრაში კი ბეილი მოედანზე 70-ე წუთზე, ერიკ ლამელას ნაცვლად შევიდა, როდესაც ანგარიში იყო 1:1 და 3 წუთში გამარჯვების გოლი გაიტანა.

ეს გახლდათ გოლი, რომელსაც ინგლისურმა პრესამ made in Madrid ანუ მადრიდში დამზადებული შეარქვა — ფლანგიდან ბურთი სერხიო რეგუილონმა ჩააწოდა, ბეილმა კი თავურით შეაგდო.

სერხიო რეგუილონი „ტოტენჰემმა” „რეალისგან” 27,5 მილიონ გირვანქად შეიძინა.

ეს გახლდათ ბეილის პირველი შედეგიანი დარტყმა „სფურზის” შემადგენლობაში 2012-13 წლების სეზონში, „სანდერლენდის” კარში გატანილი გამარჯვების გოლის შემდეგ.