ინგლისმა წააგო, ფანები ვენგერს ითხოვენ!

ინგლისელი ფანები ფეხბურთის ასოციაციას ნაკრების მწვრთნელის გარეთ საუთგეიტის გაშვებას და მის ნაცვლად არსენ ვენგერის დანიშვნას სთხოვენ. გულშემატკივარმა გუშინ, შინ, დანიასთან 0:1 წაგება ვერ აიტანა და მიაჩნია, რომ უკვე ყველაფერი გარკვეულია — საუთგეიტი შანსს აღარ იმსახურებს.

ეს იყო ერთა ლიგის A2 ჯგუფის შეხვედრა. ჯგუფის მეორე მატჩში ბელგიამ ისლანდიაში 2:1 მოიგო. ამრიგად, ცხრილში 9 ქულით პირველ ადგილზე ბელგიელები არიან, მეორეზე 7 ქულით დანიელები, ხოლო ინგლისელები ასევე 7 ქულით, მათთვის უჩვეულო მესამე პოზიციაზე იმყოფებიან. ისლანდიას ქულა არ აქვს.

ინგლისისა და დანიის შეხვედრაში მასპინძელთა ნაქებმა ცენტრალურმა მცველმა, ზაფხულში, ბარში ჩხუბის გამო საბერძნეთის ციხემოვლილმა ჰარი მაგუაირმა 32-ე წუთზე მეორე ყვითელი ბარათის მიღება მოახერხა და თანაგუნდელები რიცხობრივ უმცირესობაში დატოვა.

სამი წუთის შემდეგ კი ინგლისელთა საჯარომოში დანიელ ტომას დელანისთან კაილი უოქერის ჭიდაობა პენალტით და კრისტიან ერიკსენის გოლით დასრულდა.

ათი კაცით დარჩენილმა ინგლისმა ანგარიშის გათანაბრება ვეღარ შეძლო.

ბოლო პერიოდში გულშემატკივარს საუთგეიტის საწინააღმდეგო განწყობა იმან გაუძლიერა, რომ ბოლო სამ შეხვედრაში ინგლისის ნაკრებმა შვიდი ჩამშლელი ფეხბურთელით ითამაშა.

დანიასთან მატჩის დამთავრების შემდეგ, სოციალური ქსელები საუთგეიტის გადადგომისა და მის ნაცვლად ნაკრების თავკაცად არსენ ვენგერის დანიშვნის მოთხოვნამ ააჭრელა.