ძიუდოც ბრუნდება

ძიუდოს საერთაშორისო ფედერაციამ (IJF) მსოფლიო ტურის განახლება გადაწყვიტა და წელს 2 ტურნირს გეგმავს, ხოლო ერთიც იანვარში გაიმართება. ეს რაც უკვე ვიცით.

პირველი ტურნირი ოქტომბრის ბოლოსთვის ჩანიშნული ბუდაპეშტის გრან-პრი იქნება. დეკემბერში გაიმართება ტოკიოს დიდი სლემი, ხოლო 2021 წლის იანვარში – დოჰას მასტერსი.

სამივე ტურნირს ტოკიოს 2021 წლის ოლიმპიური თამაშებისთვის სალიცენზიო დატვირთვა ექნება, სადაც სარეიტინგო ქულები გათამაშდება. ერთია, მონაწილეთა მცირერიცხოვნობის შემთხვევაში, ტურნირმა შეიძლება საკვალიფიკაციოს სტატუსი დაკარგოს.

ამ ტურნირებისთვის, IJF-მ სავალდებულო რეგულაციები შემოიღო, რომელთა დაცვა აუცილებელი იქნება ამ ორგანიზაციის ეგიდით გამართულ შეჯიბრებებზე:

მონაწილე სპორტსმენს, მინიმუმ, ორჯერ უნდა ჰქონდეს უარყოფითი პასუხი კოვიდ-19-ზე;

ტურნირის ყველა მონაწილემ, მწვრთნელმა, მსაჯმა, დელეგატმა, ოფიციალურმა პირმა თუ სხვა დამსწრემ აუცილებლად უნდა გაიაროს თერმოსკრინინგი – წინააღმდეგ შემთხვევაში ის საასპარეზო დარბაზში არ დაიშვება;

ქვეყანაში ჩასულ უცხოელ მონაწილეებს – სპორტსმენებს, გუნდებს, ოფიციალურ პირებს და შეჯიბრების სხვა მონაწილეებს ტემპერატურას შეუმოწმებენ აეროპორტში, სასტუმროში, არენაზე შესვლისას.;

აუცილებელი იქნება ვირუსის გავრცელების პრევენციისთვის აუცილებელი სხვა ღონისძიებების დაცვა – სოციალური დისტანცირება, პირბადის ტარება და სხვა;

თუმცა, IJF ეპიდემიოლოგიური ვითარების შესაბამისად, კალენდარში ცვლილებების შეტანის უფლებას იტოვებს.

ავტორის პროფილი

ირაკლი ნინიძე: ლეგენდის თანახმად, ამხანაგი ირკალი ნინიძე „სარბიელის“ ავტორია გასული საუკუნიდან, თუმცა ზუსტად რომელი წლიდანაა გადაჯაჭვული მისი ბედი „სარბიელთან“, ლეგენდა დუმს. რატომ დუმს ? იმიტომ, რომ ამხანაგ ნინიძეს არ უყვარს მოლაპარაკე ლეგენდები. მას უყვარს სპორტი, წერა და სპორტზე მარჯვედ წერა...