პსჟ, ნაგელსმანი, მათემატიკა

მსურველმა ყველაფერი ნახა. ფაქტია, რომ ფრანგულმა პსჟ-მა გერმანული „ლაიფციგისგან“ ქვა ქვაზე არ დატოვა (3:0) და ჩემპიონთა ლიგის ფინალში გავიდა.

ემოციები უკვე ჩაცხრა. ახლა მარტო ციფრები იყოს:

– ეს ამ გუნდების პირველი შეხვედრა იყო, რაც არ არის გასაკვირი. „ლაიფციგი“ 11 წლის წინ დაარსდა.

– 2008 წელს ამ გუნდების მწვრთნელები თომას ტუხელი და იულიან ნაგენსმანი „აუგსბურგი II“-ს წარმოადგენდნენ. პირველი წვრთნიდა და მეორე თამაშობდა.

– იმავე 2008 წელს პსჟ ლიგაში დარჩენისთვის იბრძოდა, „ლაიფციგი“ კი ჯერაც არ არსებობდა.

– 33 წლის ნაგელსმანი რეკირდსმენი გახდებოდა, თუ ამ ასაკში გუნდს ჩემპიონთა ლიგის ფინალში გაიყვანდა. რეკორდი 35 წლის დიდიე დეშამს დარჩა, ვინაც 2004 წელს ფინალს „მონაკოსთან“ ერთად უწია.

– ტიაგო სილვამ პსჟ-ის მაისური ევროთასებზე 53-ჯერ მოირგო და ეს საკლუბო რეკორდია.

– გერმანელებს სასტარტო შემადგენლობაში სამი ფრანგი ჰყავდათ, ფრანგებს – ორი.

ისე კი, ფრანგებზე ალალია. იმსახურებდნენ. ახლა მეტოქეს დაველოდოთ. ხანდახან „ლიონმა“ ისეთი სიურპრიზის გამოცხობა იცის…

ავტორის პროფილი

გიორგი ნოზაძე: მას შეეძლო, დილის 11 საათისთვის გაზეთის ორი გვერდი მზად ჰქონოდა და გადაერეკა თანამშრომლებისთვის - ნუ შეწუხდებით, სამსახურში ნუღარ მოხვალთ, საქმე გაკეთებულია. ფეისბუკის ნამდვილი ფეისი. ის გახლავთ სოციალურ ქსელში "მოამბეც" და "ვრემიაც".